Shillong, Risaw 18 : Ka Kynhun Myntri ka Sorkar Jylla, ha ka sngi Thohdieng, kala ai jingmynjur ia ka skhim, ka ban ai jingiarap song pisa ba mar T. 2 lak sha ki District Task Force (DTF) na ka bynta ban pyntreikam ia ka Meghalaya Residents Safety and Security Act (MRSSA), 2016 hapoh ka Jylla.
Haba kren sha ki lad pathai khubor hadien ka jingialang, ka Myntri ba khmih ia ka tnad Ain, kong Ampareen Lyngdoh kala ong ba ka Sorkar ka donkam ban wanrah ia kane ka skhim na ka bynta ban pyntreikam ia ka MRSSA.
“Kane ka skhim ka don ia ki kyndon ba ki DC kin ioh ia ka mang tyngka khnang ba ki kam bad ka jingkhmih ia ka MRSSA kan sdang noh kham kloi kat kaba lah. Namar kata, ngi la rai ban ai ia ka song pisa ba T.2 lak ia man ki District. Ha ki District, kin donkam ia ka mang tyngka kaba bha namar ka jingdon bun ki bor kum ki Dorbar, ki ban sa iarap ban peit lem ia ka jingwan rung ki briew ba nabar” kala bynrap.
U Secretary ba khmih ia ka tnad Ain bad Parliamentary Affairs Bah Cyril Diengdoh ula ong ba ki DTF ki dei kiba la aibor ban leit pynshisha ia ki nongshongwai kat kum ki kyndon jong ka MRSSA.
“Hapoh kane ka kyndon, phi donkam pisa ban thied laptop, computer bad ring internet. Ka DTF ka don ia ki non official member (dkhot bym dei ki briew Sorkar) ia kiba ngi hap siew ia ka jingshong jingialang, TA/DA bad kiwei kiwei ki jingdon kam. Bun ki Rangbah Shnong kila pan ia ki laptop bad computer khnang ba kin lah ban pynrung kyrteng ia ki trai iing bad ki nongshongwai hala ki jong ki Shnong” ula ong.
Kat kum ka jingong jong u, bun ki shnong ha sor Shillong kila sdang ia ka project kum ka jingpyrshang, ban sdang pyntrei kami a ka MRSSA da kaba pynrung ia ki jingtip baroh shaphang ki trai iing bad ki nongshongwai hala u jong u pud u sam.
“Hynrei, kila mad ia ki jingeh namar ka dei ka online database. Balei Online, ka daw hi ka dei namar ba hap ban iasam lang bad ki Pulit bad ka DTF bad ia kata ka database la pynrung ha ka portal” ula ong.
