Shillong, Rymphang 26 : Ka Sorkar Jylla hynne ka sngi Nyngkong, kala ai jingmynjur ia ka draft Meghalaya Power Policy 2024, ka ban plie lynti ia ka jingpyntrei ia ki project pynmih bording lyngba ka hydro, thermal, pumped storage, solar, wind bad kiwei kiwei, ha ka lynti kaba janai bha.
Ia kane la pyntip da u Myntri ka Tnad Bording Abu Taher Mondal hadien ka jingialang jong ka kynhun Myntri bad ong “Ngi la iakren sani bha ia kane ka Policy ba thymmai bad ka Kynhun Myntri kala ai jingmynjur ia ka”.
Ula pyntip ba ka power policy kaba rim, ka dei kaba la shna ha u 2010. “Khatsaw snem kala iaid ka por bad kam shym la don ki jingkylla kiba heh ha ka jingpynmih bording..kumta ngi donkam ia ka power policy ba thymmai” ula bynrap.
Kane ka policy barim kam shym la kynthup satia ia ka bynta kaba iadei bad ka pumped storage project, ia kaba la kynthup lang mynta.
Ka kynhun Myntri kala rai ruh ban pynkylla ia ki kyndon jong ka kam pynmih bording na ka sngi (solar energy) haba phai sha ka kam ban thied ia ki tiar ki tar ban lah pynmih bording na ka sngi.
U Myntri ula ong ba kane ka Policy thymmai kan pynshlur ruh ia ki nongsengkam ba kin wan sha ka Jylla khnang ba kin lah ban pyntrei ia ki project pynmih bording ha Jylla.
Ula pyntip ba baroh ki kam pynmih bording kila shah kynthup lang ha kane ka Power Policy ba thymmai. “Kane ka policy ka dei ka jingbtin lynti ba kumno yn pynsdang ia ki project pynmih bording” ula ong.
U Myntri ula ong ba ka jingthmu ba hakhmat eh jong ka Policy ka long ban wanrah ia ki Pumpeed Hydro Power Project hapoh ka Jylla, ban khring ia ki nongkynshew kam shimet, ban pynmih khajna ia ka Sorkar bad ban kyntiew ia ka ioh ka kot jong ka Jylla.
Nalor kane, ula ong ba ka Policy ka thmu ruh ban wanrah ia ka thermal power project ba lah ban pynmih bording haduh 250 MW.
