Shillong, Naiwieng 16: Ka Kynhun Myntri ka Sorkar Jylla hynne ka sngi Palei, kala mynjur ia ka kyndon thymmai (amendment) jong ka Meghalaya Fiscal Responsibility and Budget Management Act, 2006, ban nang pynbun ia ka jinglah shim ram jong ka Sorkar sa .5%.
Haba iakren bad ki nongthoh khubor hadien ka jingialang, u Myntri Rangbah Conrad K Sangma ula iathuh ba ha u snem bala lah ruh, ia kane ka Ain la pynkylla thymmai bad la leh ia kane namar ka Sorkar India kala shah ia ki Jylla bapher bapher ba kin pynkiew ia ka jingshim ram kaba la pynshong nongrim kat kum ki jingpynjanai ha ka rukom treikam (reforms) bala shim da ki Jylla ba manla u snem.
“Ha u snem bala lah, ka jingpynjanai ha ka jingtreikam bala shim da ka Sorkar Jylla ha ki Tnad bapher bapher kala shah ia ngi ban nang kyntiew ia ka jingshim ram haduh 4% bad mynta u snem ruh, namar kine ki jingpynkylla, ngi la lah ban shim ram sa .5%” ula ong haba bynrap “Manla u sngi ngi hap ban pynkylla ia kane ka Act lyngba ka Ordinance bala mynjur mynta ka sngi”.
Haba kylli, u Conrad ula ong ba u pud ba lah ban shim ram da ka Jylla ka kot kumba T. 400 klur.
“Manla u snem ka dei tang 3% hynrei kila shah 3% ban pynkiew sha ka.5% bad sa .5% kaba shong kat kum ki jingpynjanai jong ka Sorkar Jylla ha ka rukom treikam. Mynta u snem, ngi la iatreilang bad ka Sorkar Pdeng bad halor ki jingpynkylla ba ngi la shim, la shah ia ka Jylla ba kan shim ram sa kumba.5%” ula bynrap.
Kat kum ka jingong jong u, u pud ba lah ban shim ram ha u snem bala lah ka long kumba T.900 klur.
