Shillong, Risaw 18 : Haba iaid kat kum ka jingbthah ka Sorkar Pdeng, ka Sorkar Jylla ha ka sngi Balang, kala ai jingmynjur ia ka Draft jong ka Meghalaya Street Vendors (Protection of Livelihood and Regulation of Street Vending) Scheme 2023.
Lyngba kane, ka Sorkar ka don jingthmu ban pynbiang tarajur hapdeng ka jingdonkam ban ailad kamai jakpoh ia ki nong shongdukan madan bad ruh ka jingdonkam ban pynthikna ia ka shongsuk shongsain, ka jingpyllait ia ka jingkhapngiah, ka jingshngain jong ki nongiaid nongieng bad kiwei kiwei.
Kane ka rai jong ka Sorkar Jylla ka dei kaba iaid kat kum ka Street Vendors (Protection of Livelihood and Regulation of Street Vending) Act, 2014, kaba la mynjur da ka Sorkar India ha u snem 2014, kaba la bthah ia baroh ki Jylla ka Ri ba kin thaw noh iala ki jong ki Rule khnang ban the kyndon ia ka jingiashong dukan madan bad ban ai jingiada ia ka hok jong ki nongshong dukan madan.
In order to regulate street vending and to protect the right of vendors, GoI came up with the Street Vendors (Protection of Livelihood and Regulation of Street Vending) Act, 2014 whose rules were to be framed by the State Government. To frame the rules, the Draft Meghalaya Street… pic.twitter.com/GtuIb6E2gn
— Conrad K Sangma (@SangmaConrad) October 18, 2023
Haba thoh ha X (Twitter ba mynshuwa) hadien ka jingialang jong ka Kynhun Myntri, u Myntri Rangbah ka Jylla Conrad K Sangma ula pynbna ba ka kynhun Myntri kala ai jingmynjur Draft Meghalaya Street Vendors (Protection of Livelihood and Regulation of Street Vending) Scheme 2023 ha ryngkat katto katne ki jingpynkylla ia ki kyndon.
Ka skhim kan kynthup ia ka Town Vending Committee ka ban pynithuh ia ki nongshongdukan madan ba shongain ha ryngkat ki kyndon kum ka –
– Ka jingdon ia ka EPIC Card, Residential Certificate ba ym duna ia ka 3 snem ha Meghalaya,
– Kiba la shong dukan madan ha kajuh ka jaka haduh 6 bnai kynthih,
– Kiba don iaki Trade Licence ha ki jaka kiba hap shabar ki 3 tylli ki Normal Area kiba khmih da ka Shillong Municipal Board.
“Ngi don jingthmu ban pynlong ia ka sorbet ia ki nongshong dukan madan bad ban pyniaid ia ki aplikeshon ka ban long kat kum ki kyndon bala buh bad ruh ban ithuh (map) ia ki jaka ba lah ban shong dukan madan bad ki bym lah. Ngi don jingthmu ruh ban buh da ka jaka ba kyrpang ban shong dukan madan bad pynlong iew na ka bynta ki nongshong dukan madan” ula pyntip.
Street Vendors Act 2014
Ka Street Vendors (Protection of Livelihood and Regulation of Street Vending) Act, 2014 ka iada ia ka hok jong ki nongshong dukan madan ha jaka sor bad teh kyndon ia ki kam ba iadei bad ka rukom shongdukan madan. Ka Act ka dei kaba la mynjur da ka Rajya Sabha bad kala ioh ia ka jingmynjur u President ha ka 4 tarik Lber 2014. Kane ka Ain kala treikam naduh ka 1 tarik Jymmang, 2014. Ka Act ka ong:
– Ai jingiada ia ka hok ban kamai jakpoh
– Ai ia ka Social security ia ki nongshong dukan madan
– Teh kyndon ia ka jingshong dukan madan ha jaka sor
– Khang ia ka jingkyndang bad pynkynriah khlem da iaid kat kum ki lynti kiba dei
– Ban ithuh ia ka kam shong dukan madan kum ka hok ban kamai jakpoh
– Ban ai jingiada ia ka hok jong ki nongdie dukan madan kum ki nongbylla
Ka jinglong jingman ka kam shongdukan madan ha Shillong
Ka Meghalaya & Greater Shillong Progressive Hawkers and Street Vendors Association (MGSPHSVA) kala mih shakhmat ban iakhun ia ka hok jongki nongshong dukan madan bad dawa ban ai jaka ba kin die ia ki mar ki mata ha ka rukom kaba I don burom.Wat hapdeng ka jingiathir iathai kiba bun, ym sym la lah satia ban pynkynriah ia ki nongshong dukan madan na Police Bazaar lane Laitumkhrah. Hynrei, na ka sngi sha ka sngi, ki nongshong dukan madan kila nang kha roi ha kylleng ka nongbah Shillong, kaba la nang pynkhapngiah shuh shuh ia ki lynti iaid jong ka Nongbah.
Pule lang ia kane: “Ka UDP kam pat rai iano ban ai ticket iakhun elekshon Lok Sabha-2024” : Metbah
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
