Shillong, Risaw 18: Ka Meghalaya State Planning Board (MSPB) kala bthah iaka tnat kam pohing, PWD, ka tnat pynroi sor bad ka tnat Transport ban ia ai ia ki jingbatai kiba bniah (Presentation) halor ki lad lynti kumno ban lah weng iaka jingdheng kali ha sor Shillong.
Kane ka rai kala mih na ka jingialang jong ka Meghalaya State Planning Board haka jingdon lang ki tnat treikam sorkar bapher bapher ban iathir iaki kam ba donkam ban pyntyllun.
Haba kren sha ki lad pathai khubor, u Chairman ka MSPB Bah Metbah ula iathuh ba haka jingialang kala don ka jingiathir sani bha haba iadei bad ki kam jong baroh ki tnat treikam sorkar hynrei ka jingiathir kaba kongsan ka long haba iadei bad ka jingdheng kali ha sor Shillong.
“Halor ka jingdheng kali ha sor Shillong, kine baroh ki tnat treikam bala jer kyrteng kin hap ban wanrah ia ki jingai jingmut bad ki jingbatai ba bniah ia ki lad ki lynti ban iakhun ia kane ka jingeh (Presentation)” ong u Bah Metbah.
Haba kylli katno sngi ka MSPB ka buh por ban ioh pdiang iaki jingai jingmut, u bah Metbah ula ong “Ka Tnad ka khlem buh satia iakano kano ka por hynrei kala bthah iaka tnat kam pohing, PWD, ka tnat pynroi sor bad ka tnat Transport ban pynbiang katba kloi iaki jingai jingmut ban lah weng iaka jingdheng kali hangne ha sor Shillong”.
U bah Metbah ula iathuh ba haka jingialang, la shim rai ruh ban khot iaka tnat Bording ban ai ia ki jingbatai ba bniah (presentation) halor ka jinglong jingman ka rukom sam bording shaki paidbah ka jylla.
Kiba la wan iashimbynta ha ka jingialang ki kynthup ia ki MLA, ki ophisar ka tnat PWD, ka tnat kampohing, PHE, Transprot, ka tnat pynroi sor, ka tnat ka rep ka riang, ka tnat boding, ka Water Resource bad ka tnat Soil bad kiwei kiwei.
