Shillong, Rymphang 15 : Ka Kynhun Myntri ka Sorkar Jylla hynne ka sngi Palei, kala ai jingmynjur ia ka Meghalaya State Investment Promotion and Facilitation Bill, 2024 kaba thmu ban bujli noh ia ka Single Window Agency (SWA) bad ka Investment Meghalaya Authority (IMA) ha kaban pynjanai bad pynsuk ia ka jingkynshew sengkam hapoh ka Jylla Meghalaya.
Haba iakren bad ki nongthoh khubor hadien ka jingialang, u Myntri Rangbah Conrad K Sangma ula ong “Ia kane ka Bill la ai jingmynjur da ka Kynhun Myntri bad yn sa rah noh ia ka hapoh ka Iingdorbar Thaw Ain ban ioh jingmynjur”.
Ula ong ba ka daw ha lyndet kane ka rai ka long namar ka SWA kala don la slem bha bad ki don shibun bah ki kam kiba hap ban pynjanai.
“Mynta da ka jingwanrah ia kane ka Bill thymmai, kan don noh ia ka rukom treikam ba long kumjuh, ha kaba yn don ruh ka application ba hap leh lyngba ki portal (website) bad kin don ki Tnad bapher bapher, kiban iadon bynta bad kane bad kan don ruh ka tracking system ban buddien ia ki jingkynshew lane ki aplikeshon ban kynshew kam kiba wan shapoh ka Jylla” ong u Conrad.
Haba pynpaw ba ki don shibun jait ki jingsengkam ki ban pynshong nongrim kat kum ka jingkynshew pisa, u Myntri Rangbah ula ong “Ki jingkynshew ba hapoh T.1 klur yn ai jingbit da ka Committee bala khlieh da ki Deputy Commissioner bad ka jingkynshew ba hapdengT. 1 klur haduh T. 10 klur yn ai jingbit da ka Committee ba khlieh da u Chief Secretary katba ia ka jingkynshew ba palat T. 10 klur yn hap ban phah sah ka Investment Meghalaya Authority (IMA), ka ban khlieh da u Myntri Rangbah ka Jylla”.
“Kumta, kane kan pynkloi ia ka rukom aplai, buddien bad kan nang pynsuk ban sengkam sengjam hapoh ka Jylla Meghalaya” ula bynrap.
 bad ka Investment Meghalaya Authority (IMA) ha kaban pynjanai bad pynsuk ia ka jingkynshew sengkam hapoh ka Jylla Meghalaya.){kind=link}