Shillong, Iaiong 02 : Ka Sorkar Jylla kala ai jingmynjur ban tei ia 186 tylli ki Iingskul Lower Primary bad ki kamra klas thymmai naka bynta ki Higher Secondary School, kum shibynta na ka jingpyrshang ban pynkhlain ia ki jingtei jong ki Iingskul haba sdang jong une u snem mang tyngka.
Haba pynbna ia kane hadien ka jingialang bishar kam ba saw kynta ha ka sngi Palei, u Myntri ka Tnad Pule Puthi Bah Lahkmen Rymbui ula ai burom ia u Myntri Rangbah ka Jylla Conrad K Sangma namar ka jingmyn jur ia kine ki project iingskul.
“Nga kmen bha ba u Myntri Rangbah ula mang ia kumba 186 tylli ki Iingskul jong ki skul Lower Primary bad kynthup ruh ia ki katto katne ki skul Higher Secondary kiba donkam shuh shuh ia ki kamra klas” ula ong.
U Myntri ula ong ba ka jingialang ka iakren ia ka jingdonka nongtrei na ka bynta ki sub division ba dang shu pynkha thymmai, kynthup ki Ophis ki Sub-Divisional School Education Officer.
“Kat ki kam kiba ngi lah ban pynbeit, ngin sa pynbeit noh mardor. Kito kiba dang donkam iakren bad ka Tnad Personnel, Finance lane bad u Myntri Rangbbah, ngin sa rah iakren ia ki” ula ong.
Ka jingmynjur jong ka Kynhun Myntri ia ka Meghalaya Teachers Training Academy kala mih ha ka jingiakren ha ka jingialang.
Ka Tnad Pule Puthi kala pynmih jingpynbna halor ka Academy bad bthah ia u Director bad ki Ophisar ba kin shna ia ka plan ban pyntreikam.
“Ka jingai jingikai ia ki nonghikai ka long kaba kongsan bha. Ngi la ban jur ha ki ba kin shna ia ki plan bad ban rai kumno ban pyniaid ia ka” ong u Bah Rymbui.
U Myntri ula shong bishar kam ruh halor ka jingpynkhreh na ka bynta ka eksam Meghalaya Teachers Eligibility Test, kaba la pynbna da ka Directorate of Education Research and Training.
U Bah Rymbui ula kubur ia ki jyrwit jyrwat hadien ka hukum ka Iingkashari Supreme Court ba ong ba ki nong hikai ba don mynta ha ka kam ki dei ban pass. “Ngi tip ba kan sa mih ka jingeh namar ba bun na ki kyrtong kin don. Ngi la iakren kumno, lano ban pynlong ia ka eksam, bad ba kam dei ban don jingeh hano hano ruh” ula ong.
