Shillong, Nailar 26 : Ka Kynhun Myntri ka Sorkar Jylla ha ka sngi Ba-ar, kala ai jingmynjur ia ka amendment jong ka service rule ka tnad Fisheries.
Haba kren sha ki lad pathai khubor hadien ka jingialang, u Myntri Rangbah Conrad K Sangma ula ong ba lyngba kane ka jingpynkylla thymmai, ka Sorkar kala weng noh ia ka kyndon kaba buh ia ki nongtrei ba ki dei ban don kumba 5 snem ha ka kam ba kin ioh ia ka hok ban kiew kyrdan ha ka Tnad.
Kane ka rai ka thmu ban ai kajuh ka lad ban kiew kyrdan ia baroh ki nongtrei kiba dei hok ban ioh, khlem da khein ia ka por ka jingshakri jong ki.
“Kane ka kyndon kam ju don ha ka Tnad, kumta, ngi la weng noh na ka tnad Fisheries ruh namar ngi sngew ba ki nongtrei wat hadien ka jingshakri ba bun snem, tang namar kane ka kyndon ba 5 snem, kila duh ia ka lad ban kiew kyrdan ia kaba nga sngew ba kam iahap satia. Ngi la weng noh ia kane ka kyndon ban pynlong kumjuh ia baroh” ong u Myntri Rangbah.
