Shillong, Nohprah 20 : Ka Kynhun Myntri ka Sorkar Jylla ha ka sngi Thohdieng, kala ai jingmynjur ban pynkha ia ka Meghalaya Livelihood Investment Financing Cooperative Society (MLIFCS).
Kane ka Cooperative Society ba thymmai kan treikam kum ka Financial Institution, ka ban bei pisa bad ka kheng ia ki kynhun Nongrep bad ki Processing Unit. Ka jingpynleit jingmut ba hakhmat eh ka dei ka rep ka riang bad ka food processing, da ka jingthmu ban pynsuk ia ka jingpynioh pisa ia ki Nongrep bad pynshlur ban pynmih ia ki mar bapher bapher na ki marrep.
“Ka jingthmu ban pynkha ia kane ka Cooperative Society ba thymmai ka long eh ba kan shim ia ka bynta kum ka Financial Institution ka ban bei tyngka ia ki Cooperative Society bad ruh ba kyrshan ia ki bad kyrshan ia ki nongrep ba kin seng ia ki processing unit bapher bapher bad ba kin don bun ia ka kheng khnang ba ka jingsiew sha ki nongrep kan long hapoh ka por ba dei” ong u Myntri Rangbah haba kren sha ki lad pathai khubor hadien ba pyniaid ia ka jingialang.
“Kane kan dei eh na ka bynta ka rep ka riang bad ka food-processing bad ngi iohi ia shibun ki lad ki lynti ban kiew ha kine ki lai-saw snem ban wan” ula ong.
Nalor kane, ka kynhun Myntri kala ai jingmynjur ruh ban pynkylla ia ka Meghalaya Planning Service Rules.
.){kind=link}