Shillong, Risaw 20: Ki jaidbynriew Pnar kiba sah ha ka shnong Lapanngap shen kin leit ban bteng biang ban leit ot kba ha ka thain khappud bad ka jylla Assam bad ban bteng ban pynneh ia ka shongsuk shongsain ha katei ka thain khappud.
Ia kane ka rai la shim ha ka jingialang kaba la long ha Assam BOP ha Khanduli hapdeng ka jylla Meghalaya bad Assam.
Ha kane ka jingialang la wan ban iashimbynta da u ADC bad u Border Magistrate na West Jaiñtia Hills u Bah GH Passah katba na ka West Karbi Anglong District la wan mihkhmat da u Deputy Commissioner u SP Sarma bad u Superintendent of Police ka West Karbi Anglong u R.Barua.
Kiwei kiwei kiba la iashimbynta lang ha katei ka jingialang ki kynthup ia ki Rangbah Shnong na West Jaiñtia bad na West Karbi Anglong District bad ki kynhun kiba pawkhmat na baroh artylli ki jylla.
Lah ban ong ba kane ka jinglum ia ka jingialang kadei hadien ba kala don ka jingduh leit ot kba ki jaidbynriew Pnar mynta la shi taiew tam, namar ka jingmih ka jingiakynad hapdeng ki jaidbynriew Pnar na Lapangap bad ki jaidbynriew Karbi kiba na ka shnong Tahpat.
Ha katei ka jingialang u SR Sarma ula pyntip ba kila shim ia ka rai ba ka jingleit ot kba kan bteng biang ryngkat ka jingpynneh ia ka shongsuk shongsain na baroh arliang bad ban don ia ka jingiatreilang ha kaba iadei bad ka jingtohkit halor ka jingkhlad jong u Oriwel Timung uba na ka shnong Tahpat uba la khlad ha ka 8 tarik u Risaw ha ka jingiakynad hapdeng kitei ki arliang mamla.
