Shillong, Jylliew 02 : Kum ka jingjop ba markylliang ia baroh artylli ki Jylla, ka Jylla Meghalaya bad Assam kila mynjur ban iaplie lang noh ia ka Kulsi multi-purpose irrigation and hydroelectric power project bala sahteng la slem bah.
Ia kane ka rai la shim ha ka jingialang hapdeng ki Myntri Rangbah ki ar Jylla-Conrad K Sangma bad Himanta Biswa Sarma,kaba long ha Guwahati hynne ka sngi Nyngkong.
Ka Kulsi Project, kaba la sdang pyntrei ha u snem 1997, ka dei ka project pynpoi um sha ki jaka rep (irrigation) bad ka project pynmih bording ha Brahmaputra Basin, ka ban ai jingshakri ia ki jaka khappud ka Meghalaya bad Assam. Da ka jingthmu pynmih bording ba 55 MW bad sam um sha ki jaka rep ba 26,000 hectare, ia kane ka project la pynsangeh noh namar ka jingiakajia pud.
Haba niew kum ka jingjop ia baroh ar jylla ha ka liang ka jingpynmih bording, ka jingsam um sha ki jaka rep bad ki kam jngohkai, u Myntri Rangbah ka Jylla Conrad K Sangma ula ong “Baroh ar Sorkar kila rai ban iatreilang bad kum ka dak ka jingiadei paralok hapdeng ka Meghalaya bad Assam, ngin pyrshang ban pyniaid noh shakhmat ia kane ka project”.
Ula pyntip ba ka jingiateh kular kala wan ha ryngkat ka kyndon ba “dei ban shim lang ia ka jingmynjur jong ki briew kiba sah ha kitei ki thain, ka jingiakren ka dei ban don bad ki, bad ngin sa wad ia ka lynti ban jam shakhmat ba kumno ngin pyniaid ia ka project”.
