Shillong, Nailur 21: Ka Laitkor SC ka la jop ia ka jingiakhun kaba nyngkong jong ka Meghalaya Women’s State League 2025 kaba nyngkong eh da ka ba pynliem 6-2 iaka Rympei Football Academy kaba long ha madan SSA First Ground, Polo.
Ka Meghalaya Women’s State League 2025 kadei shi bynta jong ka Meghalaya Football Association bad ka lympung ba nyngkong eh la plie da Myntri ka tnat Sports and Youth Affairs u Bah Wailadmiki Shylla, ha ka jingïadonlang ki heh ophisar jong ka MFA, ba la ïalam da u President u Bah Hamletson Dohling bad u General Secretary u Sunesh Syiem nalor ki dkhot ba jong ka Association.
Ka samla Iaraplang Nongrum jong ka Laitkor ka la thep ia ka hat-trick, da kaba thep ia ki kol ha ka minit kaba 16, 29 bad 53 minit bad kiwei pat bad thep ki kynthup ka Inrila-i-dor Khongthaw (48’, 72’) bad ka Darishisha Kharlyngdoh (90’+4) ruh ki la ïoh ban rung ha ka thup kol, katba naka liang ka Rympei la thep daka Pynhun Shulet (28’, 90’).
Haba kren shwa ban sdang ka jingïalehkai, baroh arngut kata u Myntri ka tnat Sports u Bah Wailadmiki Shylla bad u President ka MFA u Bah Hamletson Dohling ki la kren halor ka jinglah jong ka kynhun India ban rung shaka AFC U-20 Women’s Asian Cup.
Ka samla Ribansi Jamu jong ka Meghalaya hi u la don lang ha ka kynhun India ha kaba u Bah Wailadmiki bad u Bah Hamletson ki la pynpaw ka jingkyrmen ba kin dang don shuh shuh ki nongialehkai na ka jylla kiban sa phong da ka jingsngew sarong iaki Jersey ka ri India.
U Bah Wailadmiki u la ong ruh ba ka Sorkar Meghalaya ka angnud ban pynbha ïa ki jingtei ha ka kam ïalehkai bad ruh ban kyrshan pisa ïa ki nongïalehkai lyngba ki scholarship bad ki khusnam kumba la buh ha ka Sports Policy bad ïa kane lah ban ïohi ha ka jingshisha ba ka jylla ka don ïa ka mang tyngka kaba heh tam ha ka thaiñ shatei lammihngi jong ka Ri India.
U Bah Hamletson ula ong baka MFAnka la pynbna ruh dang shen ïa ka rukom ai khusnam pisa kaba la pynlong aiñ ïa ki nongïalehkai phutbol kiba mihkhmat ïa ka kynhun ïalehkai ka ri ha ki rta bapher bapher.
Lyngba ka sap tynrai bad ka jingtrei shitom jong ki, ki nongialehkai phutbol kynthei ka Meghalaya ki la shem shibun ki jingjop ha kaba ialehkai na ka bynta ki klob ha ka ri bad ruh ha ki kynhun ialehkai jong ka ri India.
Ka MWSL ka dei shi bynta jong ka jingthmu jong ka MFA ban kyntiew shuh shuh ia ka phutbol jong ki kynthei ha Meghalaya, ban ai jaka ia ki nongialehkai ban sei iaki sap bad ka rynsan ban tyngshain.
Haka Meghalaya Women’s State League 2025 ki don 13 tylli ki kynhun kiba la ïasoi ban ïashim bynta ha kane ka league ba nyngkong na ki 8 tylli ki seng district ka Jylla.
Haba phai biang sha ka jingïalehkai ba sdang, ka jingïalehkai ka la long kaba itynnad bad ka Laitkor kala lah bha ban lehkai haka kylla miet.
Ka Laitkor kadei kaba bat iaka nam lahduh jong ka Shillong Sports Association’s Women’s League 2024, katba ka Na Rympei ka la long ka nam lahduh ha ka lympung ïalehkai kaba ïadei bad ka Ri-Bhoi District Sports Association.
Ka samla Iaraplang kala thep 2 goal haka kylla step.
Ka Na Rympei ka don ïa ka kynhun ïalehkai kaba khlaiñ, ha kaba ka Pynhun, ka kapten ka Tracy Rympei bad ka Iawanlang Nongbet kidei ki nongialehkai ba pawnam hynrei ka Laitkor ka lah ban lehkai bha bad ioh thep haduh 6 goal.
Ka jingïalehkai kaban wan jong kane ka league kan long ha ka Group C ha ka 25 tarik Nailur hapdeng ka Diengshynrum SC pyrshah ïa ka Chirupheiwi Nongkynrih FC ha Khliehriatnha ka por 2baje janmiet.
Kine ki dei tang ar tylli ki kynhun kiba don ha ka Group C bad kumta kin ïalehkai markylliang home bad away bad ka kynhun kaba don ha khlieh duh kan poi sha ka Quarterfinal.
