Shillong, Naiwieng 12 : Ka kynhun ki thei ialehkai ka Jakrem SC ki la ioh rah ia ka nam kum ka lahduh jong ka lympung Meghalaya Women’s State League 2025 ba nyngkong eh, kaba la pyniaid da ka Meghalaya Football Association hadien ka jingjop ia ki thei ialehkai ka Na Rympei Football Academy da 2-1 kol, ha ka jingiakhun phainal hynne ka janmiet, ha madan, Polo.
Ka Na Rympei FA kala lah ba kan tam shakhmat da shi kol ha ka minit kaba 14 kaba la wan lyngba ka Pynhun Shulet, hynrei ha ka minit kaba 58, ka Jakrem ka la ioh ia ka kabu ksiar ban pynphai ia kane ka shi kol, kaba la long hadien ka jingbakla hapdeng ki player ka Na Rympei FA, bad ia ka kol kaba ar ka Jakrem, la ioh pat ban thep ka da ka Iaphisha Marbaniang ha ka minit kaba 72, kaba la biang pura ia ki ba kin leit phai sha la iing ryngkat bad ka nam lahduh jong kane ka lympung, kaba ka MFA ka la sdang ba kan pynlong nyngkong ia ka mynta ka snem.
Ka Jakrem ka dei ka kynhun kaba wan ba kan mihkhmat na Mawkyrwat District Sports Association, bad da kane ka nam jop, kan pynsah nam pat ia ka, kum ka kynhun ki thei ialehkai ba nyngkong ha ka jylla ban ioh ban rah ia ka nam kum ki lahduh jong kane ka lympung ialehkai Phutbol kaba kyrpang ki samla kynthei, ia kaba la iarap ban kyrshan ia ka da ka tnat jong ka Directorate of Sports and Youth Affairs.
U kongsan ba la wan ban sakhi ia kane ka jingiakhun hapdeng kine ki ar kynhun ki long u Principal Secretary Frederick Roy Kharkongor IAS, Assistant Director of Sports and Youth Affairs Paia B War Nongbri kum u symbud kongsan, bah Hamletson Dohling, bah Sunesh Syiem, kiba long President bad Secretary ka MFA lem bad ka kynhun ki nongkit kam ki jong ka.
Hynrei kaba kham pynshong shit bad ai mynsiem ia kane ka janmiet jong kane ka jingiakhun ka dei ruh ka jingwan ban ia kyrshan bad ai mynsiem da ki paid nongkyrshan jong baroh artylli ki kynhun.
Kane ka lympung la sang ia ka naduh ka 20 tarik u Nailur mynta ka snem ia kaba la wan ban plie ia ka da u Wailadmiki Shylla ba dei u Myntri ba dei khmih ia ka tnat Sports and Youth Affairs, ia kaba la pynlong ia ka ha ki san tylli ki jaka.
Ha kaba kut jong ikane ka jingiakhun, ka la don ruh ka jingsam ia ki khusnam ba shimet kum ka nam Player of the Final kaba la rah ia ka da ka Iaphisha, katba ka nam Player of the Tournament la rah ia ka da ka Sunalinda Iawren, ka Golden Glove ka leit sha ka thei ap kol ka Mawlum Tyrsad ka Ionaris Khongsit, katba ka nam jong ka Golden Boot ka leit sha ka Iaraplang Nongrum hadien ba ka la ioh ba kan thep haduh 21 tylli ki kol.
