Shillong, Naiwieng 04 : Ka kynhun ki thei ialehkai phutbol ka Laitkor SC ki la jam sha ka semifinal ka lympung ialehkai jong ka Meghalaya Women’s State League 2025, hadien ka jinglah pynliem da 10-1 pyrshah ia ki thei ialehkai ka Mawten SC, ha ka jingiakhun kaba la long mynta ka sngi ha madan jong ka SSA Stadium, First Ground, Polo.
Ha kane ka kynti jong ka jingiakhun, ki thei ialehkai ka Laitkor SC, kiba bun na ki, kidei kiba la paw bha, ki la nion bor bah ia ka kynhun ialehkai jong ka Mawten, ban jop suk ia kane ka jingiakhun.
Ha lyndet kane ka jingjop ka kynhun ialehkai ka Laitkor SC ka la wan hadien ba ka Iaraplang Nongrum, ka la lahban lam khmat ia la kynhun ban thep haduh lai kol ne hat trick (2’, 12’, 44’), ia kaba la iarap ban thep sa mar ar kol da ka Ibashisha Khongwet (49’, 63’) bad Inrila-i-dor Khongthaw (55’, 58’), ban sa mar shi kol ba la wan lyngba ka Ideibanrishisha Kharpan (26), Ibakordor Wahlang (40’) bad ka Sukrilin L Marshillong (90’+1).
Namar ka jinglah ban paw bad ban ialehkai bha, ka Iaraplang ka la ioh ba kan rah ia ka khusnam Player of the Match ba la sam sha ka da u bah Cliff Nongrum ba dei vice president ka MFA.
Ki lai tylli ki jingiakhun ba dang sah ka quarterfinal la buh ban long lashai pat ka sngi, ha kaba ka Na Rympei Football Academy kan iakhun pyrshah ia ka Bright Future SSCC kaban long ha ka por 10am.
