Shillong, Risaw 06: Ka Ibashembha Khongsit ka la ioh ban thep haduh 4 tylli ki kol ban ialam ia ka kynhun Mawlum Tyrsad SC sha ka jingjop da 8 kol ia ki thei ialehkai ka Mawsawrit SC, ha ka jingiakhun kaba dei jong ka Group B ka Meghalaya Women’s State League 2025 myn ha ka sngi saitjain.
Katba ki resol na ki artylli kiwei pat ki jingiakhun, ka Mawten SC bad ka Pay For Right, ki la lah ban khur ia ka jingjop kaba long da 2-1 hadien ba ki la pynliem ia ka Young SSCC bad Na Rynpei FA.
Haba phai biang sha ka jingiakhun ba la long ha Tyrsad, ka Ibashembha ka la ioh ba kan thep ia kine ki saw tylli ki kol ha ka minit kaba 4′, 59′, 75′, 83′, bad ia ki kol kiba sah la thep pat ia ki da ka Irilang Khongsit (6′, 29′) bad Naisha Nongrum (9′, 10′).
Katba ha ka jingialehkai ka Group A, ka jingiakhun hapdeng ka Na Rympei FA bad Pay For Right FA lah ban ong ba ka long kaba kham iakhaid bad itynnad bha jong ka MWSL 2025, hadien ba ka kynhun ka Na Rympei kaba wan ban mihkhmat na Ri Bhoi katba ka PFR kadei kaba mihkhmat ia ka Shillong Sports Association.
Ka jingiakhun hi ka long ba haduh ba kut ka kylla step, kine ki ar kynhun kim pat shim la lah ban pynkhih satia ia ka jar, pynban katba ka jingiakhun ka la jan sha kaba kut, ka Nisilia Majaw ka PFR ka la pynpaw biang ia ka sap bad ka jingtbit ka jong ka kum ka nongialehkai namar hapoh ar minit ba kan thep ia ki artylli ki kol ha ka minit kaba 75 bad kaba 77, ia kaba ka kynhun ka Na Rympei ka la ioh ba kan thep ia ka shi kol ka jong ka ha ka minit ba la pynjlan ia ka jingiakhun (90’+3), lyngba ka Cynthia Mylliem Umlong, kane kan dei ka nam jop kaba ar ia ka PFR ha kane ka lympung iakhun.
