Shillong, Nohprah 21 : Ka United Democratic Party (UDP) hynne ka sngi Balang, kala ujor pyrshah ia ki Myntri Sorkar bad ki MLA kiba don jingiadei bad ka National People’s Party (NPP) halor ka jingkynnoh ba ki pyndonkam bakla ia ka skhim FOCUS bad FOCUS+.
Ha ka shithi sah u Chief Electoral Officer, u Vice President ka UDP Bah Allantry F Dkhar ula kynnoh ba ki don katto katne ki MLA bad ki Myntri ba don jingiadei bad ka NPP, kiba pyndonkam bakla ia ka skhim FOCUS bad FOCUS+ kaba iaid pyrshah ia ka jingpynbna ia ki nongioh bynta kiba dei ki Nongrep ka Jylla Meghalaya.
Ula ong “Kane ka dei ka jingbatai jong ka Sorkar bala ioh na ki rynsan social media bad kiwei kiwei. Kaei ka Chief Minsiter FOCUS bad FOCUS + programme Meghalaya?”.
U Bah Allantry ula ong ba ka Sorkar Jylla kala pyllait ia kane ka welfare programme (ka skhim na ka bynta ka bha ka miat) ba T.200 klur. Ia kane ka prokram la pynwandur da ka Sorkar Jylla kum ka jingiarap ia ki nongrep kiba mad jingeh ha ka pisa tyngka namar ka khlam Covid-19.
Ula ong ba u Myntri Rangbah ka Jylla Conrad K Sangma ula leit iuhkjat ha kiba bun ki District bad ki Block jong ka Jylla ha kine ki lai bnai bala leit noh.
Ia ki nongrep la pynwanlang kum ka kynhun na ka bynta kane ka prokram bad iwei pa iwei I dkhot ka kynhun ki ioh mar T.5000.
Ia kane ka pisa, kat kum ka jingong u Myntri Rangbah, ka dei kaba lah ban pyndonkam kum ka pisa thied symbai ban iarap ia ki nongrep ba kin pynheh ia ka kam rep.
“Hynrei kaei kaba paw kum ka jingbym biang ka dei namar ki katto katne ki MLA bad ki Myntri kila shu sam naphang ia kane ka skhim ha ki jaka ki bym long satia wat ban rep ban riang. Kane ka pyni ba tang ban myntoi ha ka kam sain pyrthei, ka jingpyndonkam bakla ka dei ka kam ba ki leh” ula ong.
