Itanagar, Nohprah 21:Ka sorkar Arunachal Pradesh kala pdiang ia ka jingdawa jong ka All Arunachal Pradesh Students Union (AAPSU) na ka bynta ban pynrung ia ka riam tynrai ha baroh ki skul sorkar ha ka jylla na ka bynta shisien shi bnai, kata da ka jingthmu ban pynrung ha ki jingmut jngpyrkhat bad ban kyntiew ia ka jingriewspah ha ka liang ka riam ka beit jong ki trai shnong riewlum ka jylla.
Mynta lyngba ka hukum, ka sorkar jylla kala shim ia ka rai ban shah ia ki khynnah pule ka APST bad ki bym dei ki nong Arunachal ba kin pyndonkam ia ki riam tynrai ha ka shi sngi jong u bnai, kata ha ka sngi Thohdieng ha baroh ki skul khnang ban pynpaw iala ka jong ka tynrai bad ka jingriewspah ha ka liang ka kolshor bad ka riam ka beit.
Na ka liang u Dozi Tana Tara uba dei u President bad u Ritum Tali General Secretary ki la kyntu ia baroh ki kmie ki kpa ba kin phah iala ki jong ki khun ha ka riam tynrai man la ka sngi Thohdieng bad ruh ban hikai ia ki halor ka tynrai bad ka kolshor ba riewspah kiba la sdang ban duhjait noh ha kane ka juk kaba mynta.
Kham hashwa ha ki jingialang paidbah, na ka liang u Myntri Rangbah (CM) ka jylla u Pema Khandu ula kyntu ia baroh ba kin pyndonkam ia la ka jong ka ktien trai shnong haba iakren bad ki khun ki kti ha la ki jong ki iing ki sem bad kaba thmu ban kyntiew ha kaba iadei bad ka jingnang jingtip iala ka jong ka ktien tynrai.
