Shillong, K’Lyngkot 11: Ka Khun Hynniewtrep National Awakening Movement (KHNAM) hynne ka sngi Palei, kala ujor sha u Chief Executive Member (CEM) ka Khasi Hills Autonomous District Council (KHADC) ba don ki Hima ki bym bud satia iaka Khasi Hills Autonomous District (Regulation and Administration of Land) Act, 2021 haba iadei bad ka dor ban siew ia ka bai dulir.
Haba kren sha ki lad pathai khubor u Working President ka KHNAM Bah Thomas Passah ula iathuh ba kat kum ka jingaibor ka Section ba 6 (8) bad section 7(2) jong ka “The Khasi Hills Autonomous District (Regulation and Administration of Land) Act, 2021” ka Executive Committee ka la pynmih iaka notification No.DC/RBF/261/2022/21/477 tarik 04/08/23, ba ai bor ia u Syiem bad ka Hima ban shim ia ka dor na ka bynta ban ai ia ki dulir pynskhem pata bad kiwei kiwei ki kot ki sla.
U Bah Thomas ula iathuh ba ka dor jong ka jaka ka ba hapoh 5000 sq ft kan long T. 2000, jaka 5000 sq ft haduh 10000 sq ft kan long T. 3500, jaka 10000 sq ft haduh 20000 sq ft kan long T. 7000, jaka 20000 sq ft haduh 1 acre kan long T. 10,000, jaka 1 acre haduh 10 acre kan long T. 20,000 bad ka jaka 10 acre shaneng kan long T. 40,000.
“Na ka liang ka Party ngi la ioh ia ka jingujor na ki katto katne ki riew paidbah ba naka liang ki Hima kim bud satia ia kine ki jingbthah jong ka Council katkum ka ain,hynrei ki la buh beit la ka jong ka dor da kaba khein Square Ft” la kynnoh u Bah Thomas.
U Bah Thomas ula iathuh ba ka jingkynduh ia u CEM ka long ban ai jingmut iaka District Council ban pynthikna ba baroh naduh ki Dorbar Shnong, ki Raid, ki Hima kin bud ryntih ia ka ain Khasi Hills Autonomous District (Regulation and Administration of Land) Act, 2021.
Ula ong ba kane ka jingiaid lait ki Hima ka buh jingeh iaki trai jaka ban pynrung kyrteng (Register) iaki jaka puta hapoh ka District Council.
“Khnang ba kan ym kthah than ia ki paidbah ban pynskhem iala ki jaka puta, ngi la kyntu ia u CEM ban shimkhia halor kane khnang ban ai mynsiem ia ki paidbah ban pynrung kyrteng (Register) ia la ki khyndew ki shyiap sha ka Council khnang ba ngin lah ban pynthikna ia ka jinglong trai halor ka khyndew ka shyiap” ula ong.
