Guwahati, K’lyngkot 11 : U Myntri Rangbah ka Assam Himanta Biswa Sarma ha ka sngi Palei, ula pynbna ba ka Sorkar jong u, kan pyntreikam noh ia ka Uniform Civil Code (UCC) naduh mynta u snem hynrei ka UCC kan ym treikam satia na ka bynta ki paid riewlum.
Haba iakren bad ki nongthoh khubor ha Guwahati, u Himanta ula ong “Ka Uttarakhand bad Gujarat kin pyntrei nyngkong eh ia ka UCC. Ka Assam kan bud ia ki. Nga dang ap ban peit ia ka Uttarakhand UCC Bill. Ngin wanrah ia kum kajuh ka bill. Ha Assam, ki paid riewlum kin lait na ki kyndon jong ka UCC”.
“Ka UCC ka dei ha kaban pyntreikam ia ki ain shimet ba long kumjuh ia baroh ki nongshongshnong, kaba kyntiew ia ka jingialong kumjuh bad ka jinglehhok. U Myntri Rangbah Duh ka Ri Narendra Modi ula banjur ia ka jinglong kongsan kawei ka ain haba pynpaw ba ka Ri kam lah ban treikam da bun tylli ki ain” ong u Himanta.
U Myntri Rangbah ula ong “Ka Assam kan wanrah iala ka jong ka UCC hadien ka Uttarakhand bad Gujarat. Nga dang ap ia kine ki ar Jylla ba kin leh, ngi dang pynkhreh ia ka ain pyrshah ia ka jingpyn iashongkha khynnah, ka jingshonglok bun ngut. Namar kata, ka Assam Bill kan don bun ki jnit ki jnat hynrei kine baroh kin ym treikam ia ki paid riewlum”.
