Shillong, Rymphang 14 : U Myntri Sorkar Marcuise N Marak ula ujor da ka ejahar pyrshah ia ka social media page “The Garo Hills Times” namar ka jingpynsaphriang ia ka khubor lamler bad khubor shna hi ba kynnoh ba ula shah siat iap (assassinate).
Ha ka ujor bala aiti sha u Superintendent of Police, East Garo Hills,u Myntri ula ong ba ha ka 13 tarik Rymphang 2025, kane ka lad pathai khubor kala kam thok ba ula shah siat iap bad ba ka kynhun Garo National Liberation Army (GNLA) kala shim ia ka jingbahkhlieh ia kane ka kam.
“Ka jingpynsaphriang ia kum kine ki khubor lamler ka dei tang ka jingpyrshang ban pynsyier bad pynrit mynsiem, ialam bakla ia u paidbah bad pynthut ia ka shongsuk shongsain” ong u Marcuise ha ka ujor.
“Kane ka khubor lamler kala buh ha ka jingma kaba khraw hakhmat u paidbah bad ba dei ban leh da kaba tyngeh” ula ong.
U Marcuise ula kyntu ia ki Pulit ba kin pynlong mar mar ia ka jingtohkit bad ban leh eiei kat kum ka ain pyrshah ia kito kiba donkti ban pynsaphriang ia kane ka khubor lamler.
Ula pyndait lang ruh ia ka jingthoh ka “The Garo Hills Times” kum ka sakhi bad kyntu ban shim ia ki sienjam kiba tyngeh ban tehlakam ia kum kine ki kam thok kam shukor hadien habud.
Ka “The Garo Hills Times” ha ka sngi Palei kala kam thok ba ka GNLA kala siat iap ia u Myntri Sorkar bad MLA ka Williamnagar Marcuise N Marak.
