Shillong, Nailur 25 : U MLA ka BJP Bah Sanbor Shullai ula khein kam kai ia ka jingkynnoh ka Congress pyrshah ia u Election Commission bad pynksan ia ka jingnang kiew ka BJP ha Meghalaya hadien ka jingwan iasoh ki 8 ngut ki MLA ka UDP sha ka party.
Haba kynthoh ia ka jingiakhih ka Congress pyrshah ia ka Election Commission, u Bah Sanbor ula ong ba kane ka Liang Pyrshah kala pynmih ia ki jingkynnoh khlem ki jingshisha.
“Ngam lah ban kynthoh eei haba iadei bad kine ki kam. Hynrei ka Congress, naba ki dei, phi iohi, kane ka dei ka kam jong ki Liang Pyrshah. Ka kam jong ki Liang Pyrshah ka long tang ban pyrshah beit” ula ong.
U Bah Sanbor ula kynthoh ia kane halor ka jingkynnoh u President ka Meghalaya Pradesh Congress Committee (MPCC) Bah Vincent H Pala ba u Chief Election Commissioner ula pyniaid hala ka mon ia ki elekshon hapoh ka ri. U Bah Pala ula dawa ruh ia u CEC ban hiar shuki bad ban thung ia ka jingtohkit ia ka rukom treikam jong u.
U Bah Sanbor ula ong ba ka Election Commission kala dep pynshai ia ki jingkynnoh bala pynmih da ka Congress bad ong ba ki jingkynnoh ki dei ki bym don nongrim.
Ha kajuh ka por, u Bah Sanbor ula kyrshan ia ka rai jong ki 8 ngut ki MLA ka UDP ba wan iasoh sha ka BJP bad ong ba ka dei ka sienjam “ba jingiohi jngai” ha ka sain pyrthei.
Kine ki 8 ngut ki MLA kila leit iasoh sha ka BJP ha New Delhi ha ka 23 tarik Nailur, kaba la pynbun paid ha ka jingdon MLA ka party na ka 2 ngut sha ka 10 ngut ha Meghalaya.
U Bah Sanbor ula kyntu ruh ia kiwei ki MLA ba kin wan iasoh noh sha ka BJP haba pynpaw ba ka jingiatreilang kaba jan bad ka Sorkar Pdeng kan iarap ia ki constituency jong ki ban ioh bun ki kam pynroi.
“Nga kyrpad ruh ia kiwei ki MLA ba kin wan shakhmat bad iasoh bad ngi, kin sa ioh bun bah ki kam pynroi, ki constituency jong ki kin kiew, u tiew lotus, ka BJP kin phuh” ula ong.
