Thang ia ka tyngshop u Gyanesh Kumar ha Shillong
Shillong, Nailur 25 : Ka Meghalaya Pradesh Congress Committee (MPCC) ha ka sngi Thohdieng, kala thang ia ka tyngshop u Chief Election Commissioner (CEC) Gyanesh Kumar ha ka jaka pynieng kali hajan ka Additional Secretariat, haba kynnoh ba u iasylla bad ka BJP ban pyniaid ia ka Election Commission hala ka mon.
Ka MPCC kala pynlong ia ka jingiaid paidbah ha Shillong bala lamkhmat da u President Bah Vincent H Pala. Kane ka jingiaid paidbah kala sdang na Congress Bhavan bad pynkut da ka jingthang tyngshop.
“Kumba phi la iohi ha ki kot khubor, u CEC ula pyniaid hala ka mon ia ka rukom treikam ka Commission. Ha kine ki 10 bnai, 14 tylli ki jingujor la mudui da ki arngut ki Election Commissioner hynrei ula thom ia ki da ka jingiarap ka BJP” ong u Bah Pala.
Ula ong ba ka Sorkar Pdeng kala pynkylla ia ka ain ban plie ia ka lynti ha kaban pyniaid hala ka mon ia ka kam. “Ka BJP kala pyniaid hala ka mon ia ka rai jong u paidbah. Ha Haryana, ka Congress kala dei ban jop, ha Maharashtra, ka Congress kala dei ban jop bad ha West Bengal ruh kala don ka jingleh thok kaba khraw, ka jingweng ia bun bah ki nongthep vote na ka thup” ula ong.
“Ia ka thup bad ki jingkhein baroh la rai na Delhi da uwei u briew, u CEC bad ka Ophis jong u” ula kynnoh.
Haba dawa iehnohkam bad ban kem, u Bah Pala ula ong “Ngi dawa ba u dei ban hiar shuki bad ieh nohkam mardor. Hadien ka jingiehnohkam jong u, ka dei ban don ka Commission of Inquiry pyrshah ia u. Ngi dawa ba u dei ban shah kem bad dei tang kane kaba ki paidbah kin don ia ka jingshaniah bad ka jingngeit ha ka Riti Synshar bad ka rukom treikam kaba ka Election Commission kala pyniiad mynta la bun snem”.
Ula ai khublei ia ka Youth Congress, ka Mahila Congress bad ki nongtrei ka party kiba la iashimbynta ha kane ka jingiakhih wat ka jingpyntip ba dier por.
U iathuh ba ka CWC kan sa shong shen ban shim rai ia ka jingiakhih ban pynbud.
