Aizawl, Nailur 14 : Ki shipai Assam Rifles kila ioh ban kurup ia u droks ba shongdor haduh T. 87.84 klur na Champai District, ha ka jingkhynra bala pynlong pyrshah ia ki nongkhaii droks.
Ha kane ka jingkhynra, ki shipai kila ioh kurup haduh 2 lak u methamphetamine tablet ba shongdor T. 60 klur bad 3.978 kilo u heroin ba shongdor T. 27.84 klur. Ia kine ki jingdih buaid la ioh kurup ha kawei ka IIng ba shu iehshrah kaba don ha ka surok World Bank na Zokhawthar sha Melbuk, ha khappud ka Myanmar.
Ia une u drok ba wan pynpoi ma Myanmar la aiti noh sha ki Pulit ka Zokhawthar Police Station ba kin leh ia kaba donkam.
“Ka jingkhaii ia ki jingdih buaid ka dei ka jingsngewkhia kaba jur bha ia ka Jylla Mizoram bad ka India. Ki shipai Assam Rifles kila iai bteng ban pynjur ia ka jingialeh pyrshah ia ki kam khaii tuh bad kila nang pynkhlain ia ka jingkhynra ban ioh kem ia ki kingpin jong ka Narco-Cartel ha Mizoram” ong ka kyrwoh ki shipai.
Namar ka jingjur ka jingdawa droks, ki nongkhaii kila nang kiew ha ka thain Shatei Lam Mihngi bad kila pyndonkam ia kiba bun ki buit bad ki lynti ban pynpoi ia u droks ha kylleng ki Jylla ka thain.
Ha kawei ka jingjia, ki shipai Assam Rifles bad ki Pulit ka Mizoram, ha ka jingiakhynra lang, kila ioh ban kurup ia 1800 tylli kuli jong ki suloi AK-47 na lai ngut ki briew ba kynthup ia arngut ki nong Myanmar. Ia kine ki briew la ioh kem na Siaha District myn ha ka sngi Ba-ar.
