Shillong Nailar 16: Ka Director of Health Services (MCH&FW) ka Dr I Challam hynne ka sngi Hatmajai, kala pyntip ba kala don ka jingpynkylla ha kaba iadei bad ka kyndon ai injek Covid-19 ba iadei bad ka jingai injek dawai iada (Precaution Dose).
Katkum ka kyrwoh, i Dr Challam i ba long ruh I Joint Mission Director of National Health Mission, i la ong ba ka jylla ka la don mynta sa u dawai CorBevax kum u dawai iada ka ban ai hadien 6 bnai ne 26 taiew ba la pyndep ia ka injek second dose la u dei u Covaxin ne Covishield na ka bynta kito baroh kiba la kynjoh 18 snem ka rta shaneng.
“Kane kan pynlong ia u Corbevax ban treikam kum u Heterologous COVID-19 Vaccine kum ka jingiada na ka bynta katei ka rta” ila ong haba bynrap ba kan ym don kano kano ka jingpynkylla ha ki kyndon jingbthah kiba la don lypa ha kaba iadei bad ka Homologous Precaution Dose ia kiba la dep injek da ka dawai Covaxin bad Covishield.
Nalor ka Homologous Precaution Dose, ila ong, ba ka don ka lad ban ioh iaka Heterologous Precaution Dose bad u CorBevax sha baroh kiba la kynjoh 18 snem ka rta shaneng.
Baroh ki jingpynkylla ha kaba iadei bad ka jingshim iaka Heterologous Precaution Dose da kaba shim ia u Corbevax na ka bynta kito kiba lah ban shim bad kito kiba dei ban shim noh, kala don haka COWIN Portal bad kane ka kyndon kan mih naduh ka 12 tarik u Nailar 2022.
I la ong ba kito kiba dei ban ioh ia ka dawai iada, ki lah ban shim ia u CorBevax Precaution Dose, lada ki dei kiba la shim ia ka dawai tika da u CorBevax, Covishield ne Covaxin 2nd Dose, kiba la pyndep 6 bnai (182 sngi) hadien u 2nd Dose, kiba la pyndep 3 bnai (90 sngi) hadien u 2nd Dose bad Ben Type udei u HCW, FLW ne Polling Officer bad kiba ioh jingmyntoi kidei 18 snem shaneng.
Kumba long mynta, ka rta ban shim ia u Corbevax kadei na ki Private Covid Vaccination Center ka long ia kiba 12 snem shaneng bad na ki Govt Covid Vaccination Center ka long ia kiba la 12 snem haduh 14 snem.
Na ka bynta kito ki 18 snem shaneng tang ka jingai injek Precaution Dose lah ban shim ia u Corbevax na ki Center ki jaka shimet ne ka Sorkar.
Ka DHS (MCH&FW) kala kyntu bad bthah ia baroh kiba la kynjoh ia ka rta ba kin mih shakhmat ban shim iaka dawai tika namar ba ka khlam jingpang COVID-19 ka dang don haduh mynta.
“Katba ngim pat lah ban pynrem ia kane ka khlam, la bthah ia baroh ba kinbud ryntih ia ki kyndon jingbthah ne COVID Protocol, kata ban deng iaka mask, ban thet kti bad ban ieng jngai na kiwei khamtam ha ki jaka paidbah” la pynpaw i Dr Challam.
