Shillong, Nohprah 09: Ka Khasi Student Union (KSU) Khliehriat Circle ka kyntu ia u Deputy Commissioner ka East Jaintia Hills Shivansh Awasthi ba un tuklar bad pynsangeh noh ia ka jingthmu ban tei ia ka Shree Cement Integrated Cement Plant ha Daistong da ka ba kynnoh ba ka jingai jaka iaka Company ka long beain bad ka buh jingma ia ka imlang sahlang.
Ha ka shithi sha u DC, ka KSU ka la ong, “Ngi pynpaw ia ka jingpyrshah kaba jur ia kane ka projek bad ngi kyrpad ia phi ban shimkhia mardor ban iada ia ki hok jong ki riewlum, ia ka mariang jong ngi, bad ia ka lawei jong ka imlang sahlang jong ngi”.
Ka KSU ka pynpaw ba ka jingpyrshah ka long namar ba ka don ka jingaiti beaiñ ïa ki jaka jong ki riewlum trai Jylla sha u riew shimet bym dei riewlum kata u Bharat Sharma, khlem da ïoh jingbit shwa na ka bor ba dei peit, kaba pynkheiñ ïa ka Meghalaya Transfer of Land (Regulation) Act, 1971.
“Ka jingkhaii jaka hi ka long kaba beaiñ bad baroh ki jingioh jingbit (Environmental Clearance) ki long kiba beain” la ong ka shithi.
Ka KSU kala kynnoh ruh baka jingthmu ban tei iaka Shree Cement Integrated Cement Plant ha Daistong ka buh jingma ruh ia ka mariang, ka kami ka jih ki paidbah, ka jingduh ia ki lyngkha kba bad kan ktah iaka um bam um dih nalor kan pynjaboh iaka suinbneng.
Lah ban kdew ba ki nongshong shnong jong ka Daistong ki la pynlong ruh ia ki jingiakhih bad ki la rai ban pyrshah ia ka jingthmu ban pynlong Public Hearing naka bynta ban tei iaka Shree Cement Integrated Cement Plant namar ki tieng ia ka jingjaboh ka lyer, ka um, bad ka jaka jong ki.
“(Ngi dawa) na ka bor synshar district ban pynsangeh noh ïa ka Public Hearing kaba la buh ban long ha ka 19 tarik Nohprah bad ban thung kynhun tohkit High-Level Investigation halor ka jingkynnoh ban ai jaka beaiñ, ban pynduh noh ïa ka jingioh jingbit (Environmental Clearance) bad ban bat ïa ka nongrim ban ïada ïa ka hok longtrai jong ki riewlum” ong ka KSU.
“Ngim pyrshah ia ka roi ka par, hynrei ngi pyrshah ia ka jingpynjot kaba wan haka dur jong ka roi ka par”.
Ka KSU ka la pan ruh ia ka jingiarap na u Chief Executive Member (CEM) jong Jaintia Hills Autonomous District Council (JHADC) halor kane ka kam.
 Khliehriat Circle ka kyntu ia u Deputy Commissioner ka East Jaintia Hills Shivansh Awasthi ba un tuklar bad pynsangeh noh ia ka jingthmu ban tei ia ka Shree Cement Integrated Cement Plant ha Daistong da ka ba kynnoh ba ka jingai jaka iaka Company ka long beain bad ka buh jingma ia ka imlang sahlang.){kind=link}