Guwahati, Lber 25: Ka jylla Assam ka la sakhi halor ka jingmih paw biang jong ka jingpang Covid hadien saw bnai jong ka jingkynjah, kata hadien ba ki la don artylli ki positive case ha kine ki san sngi ba la dep, kaba la pynlong ia ka tnat ka koit ka khiah ba kan long kaba la husiar.
U Myntri ka tnat ka koit ka khiah ka Assam u Keshab Mahanta ha ka sngi Palei ba la lah u la pyntip ba kane ka jingpang Covid ka la iabit ia uwei u nongpang u ba dei napoh Maharashtra bad uba la don ha ka jingshah sumar hapoh ka hospital ha Guwahati.
Katkum ka kaiphot, kane ka case ka la paw pyrthei haien ba la shim ia ki 30 tylli ki nuksa ne sample ia kiba la tes ha kane ka sngi Balang ba la lah.
Kumba ka long mynta ia kumba 2% ki briew kiba wan na shabar jong ka ri lyngba ka kadliengsuin ha Guwahati la pynlong ia ka jingleh tes paidbah, hynrei kam ju don satia kaba kum kane ka kyndon na ka bynta ki nongleit nongwan kiba dei napoh ka ri.
Katba katto katne ki jylla ki la sakhi halor ka jingkiew kynsan ha ka jingiabit ia kane ka jingpang, hynrei na ka liang ki heh ka tnat ka koit ka khiah ha Assam ki la pynpaw ba ym pat shym la don satia ki case kat haduh mynta.
Nalor kata katkum u heh ka tnat ka koit ka khiah la ong ba utei u nongpang napoh Maharashtra u la shah sumar hapoh ka hospital shimet ha Guwahati bad ia uba yn khmih bniah da ki heh ka tnat ka koit ka khiah.
