Imphal, Lber 25: Uwei u nongtrei bylla na Assam ia uba la kynnoh thmu thombor da u sdie pyrshah ia kawei ka longiing ha Imphal West district u lashah siat iap ban iada lade ha ka 24 tarik mynta u bnai.Ha kane ka jingjia uwei pat u briew u la mynsaw na ka jingdei kuli.
Kane ka jingjia kala jia ha ki bynta jong ka Changangei Uchekon kaba hap hapoh Lamphel police station jong ka Imphal West district ha ka step sngi Thohdieng ba la lah.
Ki khubor ki iathuh ba utei u lanot u la leit rung ha ka iingsah jong u Laishram Thoiba hapoh Changangei Uchekon khlem kano kano ka daw kaba biang.Na ka liang kane ka longiing ka la kylli ia une u briew ba un mih noh na ka iing ka jong ki namar kim ia pei ha ka jingiakren ba une u nongwei.
Hynrei, hadien katto katne por la ong ba une u briew ula wanphai biang sha katei ka juh ka iiing da kaba rah ryngkat bad u sdie ha la ka jong ka kti bad behthong ia ki dkhot jong katei ka longiing.
Ban iada iala ka jong ka iing ka sem na ka jingma na ka jingshah thombor, u Laishram Basanta (u khun jong u Laishram Thoiba) u la mareh sha ka kamra bad sei da ka suloi kaba don laisien bad siat katto katne kuli ia une u briew da ka jingthmu ban shu pyntieng khnang ba un phet noh.
Hynrei, la ong ba u kuli u la ksam ia une u briew kaba la pynlong ba un khlad noh hashen.U hymmen jong u Laishram ruh u la ngat ha ka jingmynsaw na ka lbong na ka jingdei kuli, ong shuh shuh ka khubor.Katkum ka ILP pass ba la ioh kurup na une u briew, une u lanot u dei u ba la tip kyrteng kum u Govind napoh Assam.
Na ka liang ki bor pulit napoh Lamphel police station kila wan poi mardor sha katei ka jaka ha ryngkat ka kynhun ki stad forensic na ka tnat pulit ha ka jingiadon lang u SP ka Imphal West.
Hadien la pynkynriah noh ia kane ka metiap shapoh ka jaka buh metiap jong ka RIMS na ka bynta ban leh ia ka post-mortem.Halor kane ka jingjia ki pulit ka Lamphel ki la rejistar case bad ka jingtohkit kala iaid shakhmat.
Kham hadien la ioh jingtip ba utei u lanot u dei uba kyrteng u Govind Basumatry uba dei napoh Assam ba u dei u nongtrei hapoh ka kompeni ABCI Infrastructure Private Limited kaba pyntrei ia ka surok Kangchup road.
