Nongpoh, Jymmang 17 : Ka Dorbar Shnong Erpakon hynne ka sngi Thohdieng, kala pynlong ia ka jingialang paidbah bad ka rally hapoh ka Shnong, ban pynrem jur ia ka jingshah pyniap jong u Bah Kyrmen Lyngdoh Nonglait, dang shen hapoh ka lynti shnong.
Ia kane ka jingialang paidbah la pynlong ha madan phutbol ka Shnong bad hadien la pynbud da ka rally kaba iaid shaduh sha surok bah National Highway-6.
Ki kynhun Sengbhalang bapher bapher na Ri-lum Khasi Jaintia, ki Seng Longkmie, Seng Samla, ki riew pawkhmat ka Ri-Bhoi District lem bad ki Khynnah skul, kila iashimbynta lang ha kane ka jingialang jong ka Dorbar Shnong.
Ka dei ha ka miet 11 tarik Jymmang, u Bah Kyrmen Lyngdoh Nonglait ula shah pyniap ha uwei u bar jylla uba trei Dhaba hapoh ka shnong hadien ka jingiadih kyiad. Ki Pulit kila kem ia u Raju bad ka jingtohkit mynta ka dang iaid shakhmat.
Ki kynhun Sengbhalang kila ai ka jingiaroh ia ka Dorbar Shnong, ka Seng Longkmie bad Seng Samla kaba la pynlong ia kum kane ka prokram ban pynrem ia une u briew ula shim ia ka jingim jong u Bah Kyrmen haba phah ruh ia ka khubor sngewlem sha ki bahaiing hasem jong une u lanot.
Kila khot la wer ruh ia ka Dorbar Shnong, Seng Samla bad Seng Longkmie ba kin iatylli mlon ha kaban peitngor bha ia ki bar Jylla kiba wan rung hapoh ka Shnong namar mynta la kynnoh ba ki bar jylla kim salia shuh ba leh ia ki kam bymman ha kano kano ka jaka jong ka Jylla.
Hadien ka jingialang, la pynlong pat ia ka jingiaid rally naduh Madan football Erpakon shaduh u surok bah National Highway 06.
