Shillong, Nailar 01: Palat 12 tylli ki kynhun jong ka thain North Garo Hills ki la mih sha surok ban iaid paidbah bad dawa naki bor Sorkar ba kin shim ki sienjam ba kyrkieh halor ka jingjah rngai iwei heprit na ka shnong Upper Rajasimla kaba hap hapoh Kharkutta Block.
Lah ban kdew ba ine i heprit ila jah rngai naduh ka 18 tarik Naitung.
Kane ka jingïaid paidbah kaba la sdang na Kharkutta Mini Stadium bad kaba la ïaid lyngba ka ïew ka bad ki shnong ba marjan.
Ha kane ka jingiaid paidbah la wan shim bynta na ki seng bapher bapher, kynthup ïa ka Garo Students’ Union (GSU) Kharkutta Regional Unit, Rajasimla Youth Council, Kharkutta Youth Organisation, A’chik Students’ Protection Forum (ASPF) Kharkutta Unit, GSU Northern Zone, AHAM Northern Zone, AAYF Dainadubi, GSU Dainadubi Unit, GSMC, DEO bad ka ADIL nalor kiwei kiwei ki riewpaidbah bad ki samla pule bad u Rev. J.D. Marak jong ka Balang Rajasimla Baptist Congregation.
Haba kren ha kane ka sngi u General Secretary ka GSU Northern Zone u Bintu Sangma u la kyntu ïa ki longïing bad ki shnong ki thaw ba kin long kiba husiar bad ïada ïa ki khynnah kynthei bad ki samla kiba dang rit khnang ban lait na kum kine ki jingjia.
U Bintu u la ban jur ia ka jingkitkhlieh lang jong ka imlang sahlang ha kaba iada ia ki khynnah.
Ki nongialam na ki kynhun bapher bapher kila dawa na ka Sorkar Jylla bad ka tnat pulit ban pynjur ia ka jingwad bad ban ai jingiarap bailutksan shaka iing jong i heprit iba dang jah rngai.
Kane ka jingjia ka la pynmih ïa ka jingsngewkhia kaba jur hapoh kane ka thaiñ, ha kaba ki nongshong shnong ki dawa ïa ka jingkitkhlieh bad ka jingshim ki sienjam ba kyrkieh na ki bor Sorkar.
