Shillong, Iaiong 25: U nongiasaid ain ba paw ka jylla Advocate V. G Kynta, hynne ka sngi ula pynbna ba ula iehnoh kam kum u dkhot ka Bharatiya Janata Party (BJP) Meghalaya.
Haba kren sha ki lad pathai khubor u Advocate Kynta ula ong ba kane ka jingmih noh naka BJP kadei namar kane ka Party haduh mynta ka ibein ia u bad kam shym pat bate kam ne kam pat ju khot ia u ban don bynta ha kano kano ka jingialang ne ha kano kano ka jingiashim rai haba iadei bad ki kam jong ka Party.
U Advocate Kynta ula iathuh ba ula iasoh bad ka BJP ha u bnai Naiwieng 2022 ha ryngkat bad ka jingkyrmen ban trei naka bynta ka bha ka miat ka jaitbynriew, Party bad ka jylla baroh kawei hynrei kane ka jingleh jong ka party ka pynduh mynsiem ia u haba iadei bad ka sain hima.
Pule lang ia kane: Kloi ka JHADC ban ai jaka sha ka Sorkar ban pynlong jaka theh niut ka sor Jowai
“Kane la jingleh lyndet jong ka BJP ia u ka pyni shai ba ka Party ka ibein ia u bad iaki kam ba u leh khamtam namar ba udei u nongiasaid ain bad u ba long ruh u briew u ba kren bha ia ki mat ba ktah iaka bha ka miat ki paidbah bad ka jylla baroh kawei” ong u Advocate Kynta.
U Advocate V. G Kynta ula iathuh ba kila don kiba pynsngew ba kiba la ai jingmut ia u ban iakhun iaka ilekshon MP na Shillong seat hynrei haduh mynta um pat shim ia kano kano ka rai haba iadei bad kane.
Ula iathuh ruh ba haduh mynta ym pat don kino kino ka sengsain pyrthei kiba la wan ban tyrwa ia u ban iasoh sha kita ki Party ne ban iakhun na kita ki party ha ka ilekshon MP ka ban long ha u snem 2024.
“Ka lah ban don noh satang kawei ka LS seat kata ka Meghalaya seat namar kat kum ka jingtip bala ioh lum ka sorkar pdeng kala don jingthmu ban pynduh noh iaka Shillong LS seat” la ong u Advocate Kynta.
Pule lang ia kane: Manipur: Ioh kurup ia u drok heroin ba shongdor haduh T. 30 klur, shah kem uwei
