Kohima, Iaiong 25 :U nonglamktien ka Japan sha India, u Hiroshi Suzuki mynta ka sngi u la pynlong ka jingiakynduh ia u Myntri Rangbah (CM) ka Nagaland u Neiphiu Rio bad kyrmen ban pynkhlain ia ka jingiadei hapdeng jong kine ki artylli ki thain lyngba ki jingiamir jingmut lang hapdeng ki para nongshong shnong.
Da kaba pynthikna halor ka jingkyrmen hapdeng jong ki ban pynkhlain shuh shuh ia ka jingiadei lyngba kiba bun ki prokram kiba kynthup halor ka kolshor bad ha ka liang ka ioh ka kot, kine ki arngut ki nongialam ki la pynpaw ruh halor ka jingdonkam ban kyntiew ha ki kam shangkai pyrthei sha kane ka thain ha ki sngi ki por ki ban dang wan.
“Ngi ruh ngi sngewkmen shibun ban sakhi ia ki prokram kiba iadei bad ka kolshor jong ka Nagaland. Ngam ju mutdur ba Ngan ioh ban ialehkmen bad ban sakhi ia ki jingrwai jingshad jong ki nong Japan ha Nagaland,” ong u Hiroshi Suzuki haba kren sha ki lad pathai khubor halor ka jingioh mad ka jong u ha ka jingwan jngoh sha kane ka jylla ka thain shatei lamihngi (northeast) jong ka ri.
Na ka liang utei u nonglamktien sha India, u Hiroshi Suzuki u la pynlong ruh ka jingleit jurip ia ka C-Edge College, Dimapur, Nagaland, ka jaka ha kaba la ai ia ka jinghikai ha kaba iadei bad ka ktien Japanese na ka bynta ki Technical Intern Training Program ha ryngkat ka jingiatreilang bad ka kynhun seng ARMS.
“Nga kyrmen ba bun na ki samla pule kin wan trei wan ktah sha Japan bad ban sakhi ruh ia shibun ki sap ki phong,” ong shuh shuh u Suzuki.
