Nongpoh, K’Lyngkot 31: Kum shibynta ban iasnohkti lang bad ka jingrakhe ïaka International Water Conclave, ka Ophis u Executive Engineer, Water Resources, Ribhoi Division Nongpoh, hynne ka sngi Balang, kala mih ban pynkhuid ia ka wahduid kaba don ha ka shnong Iew Mawlong Nongpoh.
Ïa katei ka jingiapynkhuid wah laïa shibynta lang da u bah K Lyngdoh, Executive Engineer Water Resources Department, Bah JC Binan Sub Divisional Ophisar Water Resources Department, Ribhoi, u Rangbah Shnong Ïew-Mawlong, Ki Nongtrei ka Water Resources Department, Nongpoh, lem bad kiwei kiwei ki riew Rangbah ka shnong Ïew-Mawlong.
Ka Ophis u Executive engineer ka iathuh ba katei ka jingiamih ban pynkhuid ka dei kaba la leh halor ka phang ban pynneh pynsah ïaki wah ba la ai daka mariang bad ruh ban pynsaphriang ïaka khubor halor ka jinglong kordor jong ki wah.
Ka jingrakhe ïaka International Water Conclave jong une u snem ka ban sa long haka 9 bad 10 tarik Rymphang ha nongbah Shillong.
