Tura, K’lyngkot 28 : Ka Tura ha ka step sngi Ba-ar, kala kyndit thret ia ka jingmih ka poster ha kyrteng ka kynhun lehnoh ISIS-K kaba lah tah ha u post elektrik ha Tura, kaba byrngem ia ki paid Garo ba ki dei ban mih noh na ki katto katne ki jaka ka West Garo Hills.
Ia kane ka poster la lap na madan New Tura Matchokolgre, marjan ka Law College kaba don ha Araimile, West Garo Hills.
Kat kum ka jingong u Superintendent of Police ka West Garo Hills, kane ka poster ka don ia ka jingthoh ba ai kyrteng “Jingmaham ia ki Garo”, kaba byrngem ia ki paid Garo bad hukum ba kin dei ban mih noh na ki katto katne ki jaka ka West Garo Hills kynthup ia ki jaka them bad ka Tura hapoh u snem 2027. Kane ka poster kala kam ia ka jinglong trai ia ka jaka bad buh ruh ia ka por ban mih.
Kat kum kane ka poster, “Ka khubor ka long ia ki paid Garo kiba sah ha West Garo Hills bad ki jaka them kynthup ia ka Phulbari, Rajabala, Tikrikilla, Selsella, Garobadha bad Tura ba ki dei ki jaka jong ngi. Lada phi ia ieid iala ka jingim, mih noh na ka jaka jong ngi hapoh u 2027”.
“Ngi la wan. Mih noh na ka jaka jong ngi shuwa u snem 2027, lem kumta…..”ong kane ka poster bala ai ha ka kyrteng u Aminur Islam, Plian Belt Area Commander.
U SP ula ong ba ia kane ka poster, lah lap tang ha ka thain Araimile ym sha kiwei kiwei pat ki jaka jong ka District. Ki Pulit ki suba ba ia kane ka kam la leh da ki riewkhwai myntoi da ka jingthmu ban wanrah ia ka jingtieng jingsmiej bad pynheh ia ka jingiakynad ba don ha ka thain.
U pyntip ba ia kane ka poster yn sa phah ban leh test forensic.
Ka video bad ki dur jong kane ka poster kala saphriang ha ki rynsan social media, kaba la pynkhuslai jur ia ki nongshong shnong. Haba ioh jingtip, ki Pulit kila hiar mar mar sha katei ka jaka bad kila tar noh ia kane ka poster.
Ki Pulit kila register da ka case ha Araimile Police Station bad ka jingtohkit mynta kala iaid shakhmat ban lapdien ia ki briew bad pynthikna ia ka thymmei jong kane ka kam.
Ki khubor ki Pulit ki pyntip ba kane ka thain ba tah ia ka poster ka dei kabym don satia ia ki kor CCTV bad kaba dumb ha ha ka por mynmiet namar ka jingbym don ki streetlight, kaba la buh ha ka jingeh ban lap ne ithuh ia ki briew kiba donkti.
Watla ki bor Pulit kim pat pynthikna ia ka jingdon jingiadei kane ka poster bad ki kynhun lehnoh ia kane, hynrei ki Pulit kila shimkhia bha ia kane ka kam khamtam ba ka District ka dei kaba don marjan ka khappud ka Assam bad ka Bangladesh. Ki bor pahara kila pynkhlain bha ia ka jingpeitngor kum shibynta ban iada na ki kam bymman.
U Superintendent of Police ula pyntip ba ki jinglong jingman hi ki dang long kumba ju long haba kyntu ia ki paidbah ba kin long kiba jai jai, sangeh ban pynsaphriang ia ki khubor khlieng tyngab bad ki jingtip ki bym pat pynshisha nalor ban iatreilang bad ka kynhun tohkit.
