Shillong, K’lyngkot 27 : Ki Pulit ka Pasteur Beat House, ha ka sngi Nyngkong, kila ioh kem ia arngut ki runar kiba donkti ban shohbriew bad knieh ia ki mobile phone jong ki lanot ha ka thain Golflink.
Kat kum ka jingiathuh u Superintendent of Police ka East Khasi Hills, kine ki arngut ki dei u Kitbok Thabah ba ju khot sin u Koi (29) ba na Khliehshnong, Golflink bad u Daniel Syiemliej (23) ba na Dongkamon, Nongmynsong.
U iathuh ba ki Pulit ha ka 22 tarik Kyllalyngkot, kila ioh pdiang ia ka ejahar ba pyntip ba ha ka janmiet 21 tarik, arngut ki nongiaid lynti kila shah shoh ha ki runar ba shong scooty hajan ka CM Connect Building, Golflink bad shah knieh ki mobile phone.
Ha ka jingtohkit, ki Pulit hynne ka sngi Nyngkong, kila iohkem ia kine ki arngut na ki iingsah jong ki bad la register case ia ki hapoh ka Sadar Police Station hapoh ka kyndon S 115(2)/304(2)/3(5) BNS.
Ki Pulit kila ioh ruh ban kurup ia ki mobile phone bad kila kurup noh ia ka scooty kaba ki pyndonkam ban leh ia kane ka kam bymman, kaba don u nombor ML05-AG-0461.
