Nongpoh, Jylliew 18 : Ka sor Nongpoh hynne ka janmiet sngi Ba-ar, kala her syrngiew na ka jingsawa ktang suloi hapoh ka surok National Highway-6, kaba la mih na ka jingiakhtong ki Pulit ia ka kynhun ki Nonglute.
Kane ka jingther kuli kala mih na ka ktang suloi jong ki Pulit ka Ri-Bhoi District, kiba la shim ia kane ka sienjam tang ban tehlakam ia kane ka kynhun ki Nonglute, kiba pyrshang ban rat naphang da ka kali ia ki nongiaid nongieng ha surok Service Road, ban phet krad na ka kti ki Pulit.
U Additional Superintendent of Police ka Ri-Bhoi District Bah B.Jyrwa, ula pyntip ba kane ka kynhun ki Nonglute ka dei kaba don 4 ngut ki briew bad kila wan da ka Scorpio rong lieh, ban lute trok ha surok NH-6 hapoh ka thain Umtrew.
U iathuh ba ha ka por 4:30 baje eiei, katba ki Pulit ka Nongpoh Police Station, ki dang talasi ha ka khyrdop ba ki buh ha Saiden, uwei u nongniah trok ula wan pyntip ia ka jingdon jong kine ki runar ha Umtrew ban lute trok. U iathuh ba mar mar hi, la pyntip ia kane ka jingjia sha ki Pulit ka Umiam Police Station bad ka Umsning Police Station.
U Bah Jyrwa u pyntip ba ki Pulit jong kine ki Thanad kila hiar sha ka jaka ba don kine ki Nonglute hynrei mar syn iohi ia ki Pulit, kine ki runar kila rahbor ia uwei u Nongniah trok bad phet krad na ka kti ki Pulit. U iathuh ba ki Pulit kila kthong ia kane ka kali naduh Umtrew haba pyntip ruh sha ki Pulit ka Nongpoh Police Station ban pynap shrip. U iathuh ba hapdeng kane ka jingiakhtong, kine ki runar kila bret noh ia une u nongniah trok na kali bad phet arsut ialade na ki Pulit.
Ki Pulit ka Nongpoh kila pynap shrip ia kane ka kali ha thain Saiden hynrei kane ka kali kala thom naphang ia ka khyrdop bad ia ki Pulit kiba pynieng kali da ka jingthmu ban rat naphang kat kaba shah ha lynti. Nangne kila phet sha ka thain Nongpoh bad ynda poi ha Nongpoh, kila rung sha ka Service Road bad niom naphang ia kiba wit ha lynti.
U Bah Jyrwa ula iathuh ba ki Pulit haba iohi ia ka jingma kaba ap ia u paidbah nongiaid nongieng, kila hap ban siat ia kane ka kali ki nonglute na ka bynta ba shakhmat haduh ba u nongniah ula hap ban pynieng iaka kali.
Ki Pulit kila kem noh ia kine ki 4 ngut ki nonglute kiba la tip kyrteng u Pradip Gogoi na Dibrugarh, Assam, u Tulan Phukan na Lakhimpur Assam, u Pranjal Gogoi na Tinsukia Assam bad u Dip Das uba dei na Bubaghat Assam.
Une u Heh Pulit u iathuh ba u Nongniah trok bala ioh ban pyllait im da ki Pulit u kyrteng u Premchand Kumar Mali uba dei na Jharkhand bad uba niah ia ka trok JH-02-AK-9061.
Ia kine ki Nonglute la kit noh sha Nongpoh Police Station bad la register case pyrshah ia ki ha kane ka thanad. Ka jingtohkit ia kine ki runar kala iaid shakhmat.
