Shillong, Jylliew 29: U Myntri ka Sorkar Jylla Bah Dasakhiat Lamare ula pyntip ba ula ioh pdiang ia shibun ki jingujor na ki lanot shlei um bad twa khyndew ba ki shah thlia ne pyndik ha ki Ophisar Sorkar haba ki leit wad jingiarap.
Kane kala jia ia ki Khynnah bad ki samla pule ki bym lap shuh ia ki cerfiticate ne ki kot ki sla ba donkam naka jingwan lynshop ki bor ka mariang dang shen hapoh ka Jylla.
“Nga la ioh pdiang ia shibun ki jingujor na ki Khynnah pule jong ki Longiing ba ngat haka apot, ba ki shah thlia bad shah pyndik ha ki Ophisar haba ki leit pan jingiarap ban ioh biang ia ki kot ki sla ba donkam ban thep klas ha ki college ne ban applai kam” ong u Myntri haba iakren bad ka Shlem.
“Kane kala jia ha Jylla bad nga sngewsih ba ki Ophisar ka Jylla ki don ia kum kane ka mynsiem khamtam ia ki lanot kiba mad ia ki jingeh na ka jingwan lynshop ki bor ka mariang ia ka iing ka sem ka jong ki” ula bynrap.
U Myntri ula kyntu ia ki Ophisar ka Jylla ba ki dei ban don ka mynsiem sngewlem, mynsiem ban iarap bad ka sngew synei ia kum kine ki longiing ha kum kane ka khep ba mynta.
“Nga kyntu ruh ia ki Ophisar kiba khmih ia ki jingdonkam jong ki Khynnah pule ba kim dei shuh ban nang thlia ne pyndik ia ki lanot ba wan pan jingiarap. Sngewbha ynnai pynshitom nalor ba kila sajia lypa lem kumta ka Sorkar kam banse ban leh da kaba tyngeh pyrshah ia ki” ula ong.
U Myntri ula kyrpad ruh ia ki khynnah kiba dang iai mad ia kum katei ka jingeh, kidei ban leit pyntip mardor sha la ki nong mihkhmat namar kin long kiba kloi ban iarap ia ki bad ban shim ruh da ka sienjam kaba tyngeh.
“Mynta nga dang ai shwa da ka jingkyrpad bad nga ngeit skhem ba ki ophisar ki jong ngi kin shimkhia ia kane ka jing kyrpad jong nga namar ngam shim la kyrpad naka byta ka jingmyntoi shimet ka jong nga hynrei kadei na ka bynta baroh ki nongmihkhmat ka jylla.
Lada kim burom ia ka jingkyrpad, ngim banse ban leh da kaba tyngeh” ong u Myntri .
“Wat ailad ia ngi ba ngin iohlad ban leh da kaba tyngeh ia phi, hynrei nga kyrpad da kaba sngewrit, ban sngap lem iaka jingkyrpad ka jong nga bad na ka bynta ka sorkar hi bad kiwei kiwei ki MLA ba lada wan ki khynnah kiba iakynduh jingeh wat pyndik ia ki hynrei iarap pynban ia ki bad wat pynslem ia ka kam jongki” ula bynrap.
