Shillong, Nailur 15: Ka jingiakhun ia ka khlam Covid-19 ha Jylla Meghalaya kala pynsuba mynta ba ka don ka jyrsieh kaba jur hadien ka jingmih ka jingkylli ia ka rukom pynlut jong ka National Health Mission (NHM) ia palat T. 567 klur ha kine ki lai snem ba wan lynshop kane ka jingpang.
Kat kum ka jingkhein bala ioh na ka Tnad ka Koit ka Khiah, ka Jylla Meghalaya kala pynlut haduh T. 8,16, 22,52,312 klur ban iakhun ia kane ka khlam kaba la wan lynshop ha Jylla naduh u Lber 2019 kat haduh mynta mynne.
Ki Heh Ophisar ka Tnad ka Koit ka Khiah (ki bym kwah pynpaw kyrteng) ki pyntip ba na kane ka song pisa ba T. 816 klur tam, ka National Health Mission (NHM) ka dei kaba pynlut bun eh kaba kot haduh T.567,29,72,968 watla ka dei tang ka Agency kaba dei pyntreikam ia ki prokram jong ka Sorkar Pdeng.
Kine ki Heh Ophisar ki pyntip ba ka Tnad ka Koit ka Khiah lyngba ka Directorate of Health Services (MI) ka la pynlut tang T.2,48,92,79,344 klur bad kane ka pisa ka kynthup ia ka song pisa ba ai da ka Sorkar Pdeng kaba long T. 8,00,98,000 bad kaba ai da ka Sorkar Jylla ka long T. 2,40,91,81,344.
Haba ai jingkhein ia ka jingpynlut ka Tnad DHS(MI), kila ong ba kane ka Tnad tang haba siew ia ka bainong jong ki Nongtrei Contract kiba iarap ia ka Jylla ban iakhun ia ka khlam ha kine ki lai snem, kala kot ia ka T.62,73,85,817 (62 klur tam) bad kaba bun eh ka dei ka jingthied ia ki dawai, ki tiar sumar naduh ki Oxygen, Ventilator, Generator, ECG Machines, X-Ray System bad kiwei kiwei kaba kot T. 1,77,27,46,039.
Kiwei pat ki jingpynlut ka dei ka jingthied ia ki kali na ka bynta ka Carona Care Centre ha Umsawli, ka jingshimwai ia ki kali ban kit ia ki Oxygen Cylinder bad kiwei kiwei kaba kot T. 1,01,81,388, ka jingthied ia 10 tylli ki Ambulance bala bei tyngka da ka NESID T.1,59,98,650, ka jingpynlut ban tei ia ka hospital pre fab ha Tura T. 2,58,84,000, ka jingpynlut ban tei ia ka hospital pre fab ha Shillong ba kot T. 2,58,84,000 bad ki jingtei ia ki jaka buh Oxygen ha Jengjal, West Garo Hills ba kot T. 80,13,250 bad ha Carona Care Centre, Umsawli ba kot T. 1,11,99,450.
Kine ki Heh Sorkar ki iathuh ba tang ka jingpynlut jong ka NHM kaba dei ka Agency ba pyntreikam ia ka prokram jong ka Sorkar Pdeng kaba kot haduh T. 567,29,72,968, (T. 567 klur tam) ym shym la ioh jingkhein satia khamtam haba bun ki tiar sumar bad ki jingtei ki dei kiba la pynlut da ka Ophis u DHS(MI).
Haba pyntip ba ka Sorkar Jylla kala ioh jingiarap haduh T. 76,56,18,000 (T.76 klur tam) na ka Sorkar Pdeng, kine ki Heh Ophisar ki ong ba na kane ka pisa, tang T. 8,00,98,000( T. 8 klur) la pynlut da ka Ophis u DHS(MI) katba T. 7,57,608,200 ( T.7.58 klur) lah pynlut da ka NHM ia kaba ym lah ban tip kumno ka pynlut bad shaei ka pynlut.
Kine ki Heh Ophisar ki ong ba kat kum ka rukom treikam, ka song pisa ba dei ban leit sha ka NHM ka dei ban wan haduh 90% na ka Sorkar Pdeng bad 10% na ka Sorkar Jylla.
“Hynrei kumno ka NHM ka lah ban ioh pynlut haduh T.567 klur tam ka pisa haba ka sorkar Pdeng ka dang ai tang T.7.58 klur ka bym pat kot wat shi percent ka bhah na ka Jylla” kila buh jingkylli.
Kine ki Heh Ophisar kila ong ba kane ka kam ka dei ia kaba hap ban pynlong ia ka jingtohkit bad kaba dawa ruh ia ka jing tohkit khnang ba kan shai ha ka rukom pyndonkam ka NHM ia kat kane ka song pisa bala pynlut da ka Jylla ban iakhun ia kane ka khlam.
