Silchar, Nohprah 16 :Ka Silchar Medical College mynta ka sngi ka la kylla long kum ka madan thma hapdeng ki doktor bad ki nongpang, kata hadien ba kala mih ka jingkynnoh ba ki doktor kila sdang ban thombor ia uwei u nongpang bad ia ka kmie jong u hadien ba kila pynpaw ba kane ka hospital ka dei ka bym khuid.
Kane ka jingjia kala wan jia hadien ba u khun ula wanlam iala ka jong ka kmie hapoh kane ka hospital na ka bynta ban ioh jingsumar.Kane ka longiing kala kynnoh ba ki doktor kila thombor ia ki dkhot jong kane ka longiing bad knieh ruh ia ki mobile phone ki jong ki.
Na ka liang ki doktor kila kynnoh ba dei ki dkhot jong kane ka longiing kiba la sdang ban pynmih jingiakynad bad ba ma ki, kila shu pyndep iala ka jong ka kamram.Khyndiat por hadien kane ka jingjia, na ka liang ki bor pulit kila wan poi mardor ha kane ka jaka ban ialam noh ia kane ka longkmie bad i u khun jong ka napoh katei ka hospital.Ha kawei pat ka bynta halor kane ka jingjia la rejistar case pyrshah ia kiba hiing hasem jong katei ka longiing namar ka jingkynnoh thombor ia ki doktor.
“Nga la wan ialam ia i mei sha kane ka jaka sumar bad pyni ia baroh ki kot ki sla ba la rim kiba iadei bad ka jingsumar.Katba ki dang shim smai na i mei jong nga, Nga la ong ba kane ka hospital ka long ka bym khuid bad ba kim kwah ban dang sumar shuh shuh hapoh kane ka hospital.Hynrei, hadien kane kila sdang ban thombor ia nga bad ia i mei jong nga,” ong u khun jong katei ka nongpang lyngba ki lad pathai khubor.
“Une u briew ula wan ha ryngkat ka kmie jong u bad hadien ba ngi la leh ia kaba donkam ngi shem ba kane ka longkmie ka dei kaba don jingshitom klongsnam bad ngi la ong ha u ba u donkam ban wad ia u doktor uba dei ia kane ka jait jingshitom na ka bynta ka kmie jong u.Hadien une u briew ula ong ba kane ka hospital ka dei ka bym khuid bad ba um kwah ban shah sumar ha kane ka jaka.Ngi la ong ba kata ka dei ka mon ka jong u.Hynrei, hadien kane une u briew ula sdang ban ringdur ia ki doktor bad ki nos bad hadien ba uwei na ki doktor ula khanglad da kaba ong ba um shym la ioh jingbit ban ringdur, ka kmie bad une u khun jong ka kila sdang ban thombor ia ki doktor kiba don hapdeng ka kam.Dei haneng ba kane ka jingiakynad kala sdang,” ong u doktor uba don hapoh kane ka hospital.
