Agartala, Risaw 28 :Ka jinglong jingman kala pynkhihwin ha ki bynta jong ka Kalyanpur kaba hap hapoh Khowai district ka Tripura hadien ki jingiakhih ba la pynlong da ki party liang pyrshah bapher bapher bad ruh na ki kynhun nongshong shnong ban dawa kem mardor ia ki runar kiba donkti ha kaba leh beijot ia kawei ka khynnah rit kaba la jia ha ka miet sngi ba Ar ba la lah.
Hynnin ka sngi Palei, ki liang pyrshah ka CPIM, Congress, Trinamool Congress, bad ka TIPRA Motha kila pynlong ka jingiakhih da kaba iaid paidbah hakhmat ka Kalyanpur Police Station bad iakynduh ruh ia ki heh pulit ban dawa kem mardor ia ki runar kiba donkti ha katei ka kam bymman.
Haba kren sha ki lad pathai khubor baroh ki party sain hima kila pynpaw ia kajuh ka sur bad kynnoh ia ka jingdonkti jong ki nongialam ka BJP hapoh ka thain ha kaba iadei bad katei ka jingjia shah leh beijot.
Ha kawei pat ka bynta na ka liang u nongialam ka CPIM ula kynnoh ia ka jingdonkti jong ki kynhun runar ba la kyrshan da ka BJP kumjuh ki nongialam jong ka ha kaba iadei bad katei ka jingjia.
“Ngi dawa ban pynshitom mardor ia ki runar kiba donkti ha kane ka kam pyntriem. Ngi kyrmen ba ki bor pulit kin pyndep iala ka jong ka kamram.Hadien ba la thaw ia ka sorkar BJP ki khynnah rit, ki longkmie bad wat kiba la kham tymmen kila kylla long ki lanot lyngba ki jingjia shah leh beijot ha ki kynhun runar,” ong ki nongialam ka CPIM hadien ka jingiakynduh ia ki bor pulit hapoh Kalyanpur police station.
Ia ka kynhun na ka Trinamool Congress la lamkhmat da ka nongialam jong ka ka Panna Deb. Kane ka nongialam kala ong; “saw ngut ki runar kila lehbor pyrshah ia ka khynnah kaba dang hapoh rta. Ki nongialam ka BJP hapoh ka thain ki dei kiba donkti ha kane ka kam lehbor.Ngi dawa ba dei ban kem ia kine ki runar hapoh ka 24 kynta.”
Ha kawei pat ka bynta na ka liang ka working president jong ka kynhun seng kynthei ka Tipra Motha Woman federation ka Manihar Debbarma kala kynnoh ba uwei u nongialam ka seng BJP hapoh ka thain u dei uba donkti ha kane ka kam leh beijot bad ba kane ka jingjia kala wan jia lyngba ka hukum ka jong u.
“Kane ka khynnah kaba dei ka trai shnong riewlum jong ngi ka dang wanphai sha la iing hadien ba kala leit ban iashim bynta ha ka jingleh niam Kali Puja, katto katne ki khynnah samla bar jylla kila rahbor ia ka bad leh beijot.Kane baroh kala wan jia hapoh ka jingialam jong u nongialam ka BJP u Bidhan Bihari Datt.San ngut ki briew ki donkti ha kane ka kam pyntriem.Kumta ruh ngi dawa ban kem mardor ia kine ki runar,” kala ong shuh shuh.
Da kaba kynthoh pyrshah ia ki bor pulit, uwei na ki nongiashim bynta ha ka jingiakhih pakhang surok ula ong; “ki 24 kynta kila dep iaid hynrei ki pulit ka Tripura haduh mynta kim pat lah ban kem ia kiba la shah kynnoh donkti.Balei ki pulit kila pulom ban kem ia ki.Kila pyrshang ban aijingiada ia ki runar.”
