Nongpoh, Nailar 20 : Ka Federation of Khasi Jaintia & Garo People (FKJGP)- North Khasi Hills, ha ka step sngi Palei, kala iamih paidbah ban khang ia ki kali ba don u registration number ka Assam, ba kin wan rung sha Meghalaya, kum ka jing pynphai kylliang ia ka jingleh ki seng ki kali tourist ka Assam.
Ka FKJGP-NKH hapoh ka jingialam u President Bah Luistar Lyngdoh, kala mih sha surok ha Baridua 9 Mer bad ha Byrnihat ban khang ia baroh ki kali ba don u nombor Assam ba kin wan kiew sha Jylla bad la pynphai pat ia ki ba kin leit sha Assam.
Haba iakren bad ki nongthoh khubor, u Bah Luistar ula ong ba ka FKJGP-NKH kala shim ia kane ka sienjam namar ka jing shah ktah ki paidbah na Meghalaya kiba shah khang lynti ha ka seng ki kali tourist ka Assam, kiba la pakhang lynti ha Khanapara bad Jorabat.
“Ngi la sdang ban khang ia ki kali Assam naduh ka por 11 baje. Ngi la ioh jingtip ia ka jingshah pynphai ki kali Meghalaya na Khanapara naduh mynstep hynrei ngi la ap ioh ka don ka jingiapynbeit, tangba kane kam shym la urlong satia bad kumta ngi la mih ban khang lang ia ki kali Assam” ula ong.
“Ngi la pyrshang ruh ban iakren bad ki nongialam ka NEIPF na Assam hynrei ka NEIPF kala pynpaw ba kam lah satia ban ai kano kano ka jingkular ban pynbeit ia kane ka jingeh. Kumta ngi la iamih ban pynphai lang ia ki kali Assam” ula bynrap.
U Bah Luistar ula pynpaw ia ka jingsngewkhia ia kaei kaba la jia ha Shillong na ka rally ba pynlong da ka Khasi Students Union (KSU) hynrei ula ong pat ba ka FKJGP kam sngew iahap ba ki seng na Assam kin pynthut ia ka leit ka wan ki paidbah.
“Ki don bun ki paidbah kiba leit sha Assam, kynthup kiba leit shim dawai, leit donkam, leit shaki jaka pule, leit trei bad kiwei kiwei ki kam, hynrei kila shah khang” ula ong.
U bah Luistar u pyntip ba ka FKJGP-NKH kan dang iai bteng ban khang ia ki kali Assam katba na ka liang ka Assam kim pat shah ia ki kali na Meghalaya ba kin rung sha Assam.
- North Khasi Hills, ha ka step sngi Palei, kala iamih paidbah ban khang ia ki kali ba don u registration number ka Assam, ba kin wan rung sha Meghalaya, kum ka jing pynphai kylliang ia ka jingleh ki seng ki kali tourist ka Assam.){kind=link}