Shillong, Nailar 29 : U Myntri ka Tnad Community & Rural Development Abu Taher Mondal ula ong ba ka jingsiew bainong kaba dang sah haduh mynta hapoh ka MGNREGS ha Jylla, kaba dei ban siew sha ki nongioh bynta ka la kot haduh T.90.11 klur.
Haba jubab hapoh ka Iingdorbar, u Mondal ula ong ba kane ka pisa ha ryngkat ka por ba pynslem ka la kot T.80.52 klur bad ka jingslem ka long hapdeng 129-212 sngi jong u snem mang tyngka 2023-24 bad T.9.59 klur ryngkat ka jingpynslem hapdeng 1-70 sngi jong u snem mang tyngka 2024-25.
Ula ong ba ka daw jong ka jingslem ka dei namar ka jingbym pyniasoh ia u Aadhaar ban leh ia ka Aadhaar Based Payment System (ABPS).
Kat kum ka jingong jong u, ka Tnad ka dang iai bteng ban peit thuh bad shim ia ki lynti ban pynbeit.
