Shillong, Jylliew 19 : U President ka United Democratic Party (UDP) Bah Metbah Lyngdoh hynne ka sngi Nyngkong ula ong ba ka jinglong jingman ka sain pyrthei kaba lam sha ka jingkhyllem ka EC u bah Titosstarwell Chyne ha KHADC, kan nym ktah satia ia ka jingiadei hapdeng ka UDP bad ka NPP hapoh ka Jylla.
“Kam pat shym don satia ka jingshim rai ba ngin nym iatreilang shuh bad ka Sorkar ba ialam da ka NPP” ong u Bah Metbah haba iakren bad ki nongthoh khubor hadien ka jingialang bad ki MDC ka party.
Ula ieng skhem ba ka jingkhyllem ka EC ba ialam da ka UDP ha KHAP kan ym ktah ia ka jingiadei bad ka NPP hapoh ka Jylla.
Ka UDP ka dei ka paralok kaba don kham bun ki MLA hadien ka NPP ban iakiwei pat hapoh ka Jylla . Hynrei ka NPP da ka jingkyrshan ka Congress ba don ha Liang Pyrshah, kala pynkhyllem ia ka EC ba ialam da u Bah Titos lyngba ka No Confidence Motion bala wanrah ha ka sngi sdang jong ka Dorbar Lyiur hynne ka sngi.
U Bah Metbah ula pynpaw ba ka UDP kam shym la poi pyrkhat satia ba ka NPP kan wanrah da ka NC pyrshah ia ka EC ba ialam da ka UDP.
“Ngim lah ban sngewthuh ia kaei ka jingthmu ha lyndet ka NC namar la shu wanrah kyrkieh bad ha kine ki saw snem bala leit, ka EC kala treikam khlem kano kano ka jingeh jingwit” ula ong haba bynrap “Kam long satia kaba itynnad ban lapmiet ha ka jingpynkhyllem Sorkar”.
U Bah Metbah ula ong “Nga kubur ba kin don beit ki jingduna ha ka jingtreikam (ha ka kynhyn synrop) hynrei kam long satia kaba itynnad ban pynkhyllem ia ka EC bad ban thaw thymmai ia ka EC manla ka sngi. Kaei kaba donkam ka long ka jingiakren bad jingiasngewthuh jingmut hapdeng ki Dkhot jong ki seng sain pyrthei bapher bapher kiba iadonlang ha ka kynhun synrop”.
Haba kylli, u Bah Metbah ula ong ba ka UDP kam lah ban sngewthuh ia ka jingiapynbeit hapdeng ka NPP bad ka Congress.
Ula pyntip ba ka UDP shen kan sa iakren ia kane ka kam bad u Myntri Rangbah ka Jylla Conrad K Sangma uba dei ruh u Chairman jong ka Meghalaya Democratic Alliance (MDA).
“Ngin sa sngap shuwa ia kid aw ba ki (NPP) pynpaw halor kane ka No Confidence Motion” ula ong haba bynrap ba ka UDP kala shim rai ban ieh ha ka jingstad jong ki MDC ba kin shim rai halor kane ka kam.
 Bah Metbah Lyngdoh hynne ka sngi Nyngkong ula ong ba ka jinglong jingman ka sain pyrthei kaba lam sha ka jingkhyllem ka EC u bah Titosstarwell Chyne ha KHADC, kan nym ktah satia ia ka jingiadei hapdeng ka UDP bad ka NPP hapoh ka Jylla.){kind=link}