Shillong, Jymmang 13 : U President barim ka Federation of Khasi Jaintia & Garo People (FKJGP) Bah Wellbirth Rani, ha ka sngi Thohdieng, ula hiar ai mynsiem bad kitbok kitwriang ia ka kynhun ialehkai Tyrsad Umkseh Sports Club, ka ban iashim bynta ha ka sien ba nyngkong eh ha ka Meghalaya State Leaque, 2023.
Ka Tyrsad Umkseh Sports Club kala ioh rung sha ka Meghalaya State Leaque (MSL), hadien ka jingioh khur ia ka nam kum ka lah duh ha ka lympung ialehkai bala pyniaid da ka Tyrsad Area Sports Association.
Ka Tyrsad Umkseh Sports Club kala don ha ka thup Group A jong ka Shillong Zone kaba don ia ka kynhun champioh jong ka Shillong Premier Leaque (SPL) ba kynthup ia ka Langsning Sports Club bad ka Mawlai Sports Club.
Kiwei pat ki kynhun kiba don ha kane ka thup ialehkai ki dei ka Jyntru Sports Club, ka Umrit Sports Club bad ka Seng Samla Laitryngew.
Ka Tyrsad Umkseh SC kan sdang ia ka jingiakhun ha ka 16 tarik Jymmang pyrshah ia ka Langsning Sports Club bad kan iakhun khatduh ia ka Umrit SC ha ka 1 tarik u bnai Jylliew.
Haba ioh jingtip ia kane ka jingiohrung ka Club sha ka Meghalaya State Leaque, u Bah Wellbirth kum u Nongshongshnong ka thain, ula leit ban iakynduh ia ki rang ialehkai ka kynhun hynnin ka step sngi thohdieng katba ki dang ia kilan met ha madan jong ka shnong.
Ha kane ka jingiakynduh, u Bah Wellbirth ula ai mynsiem ia ki rang ialehkai ha ryngkat ka kitbok kitrwiang ruh ba kin lah ban ialehkai bha bad ban poi sha ka thong kum ki nongjop.
U Bah Wellbirth ula theh ia ka song jingiarap sha ka kynhun ialehkai ba kynthup ia ki tracksuit sha ki rang ialehkai bad ka song pisa ba T. 1 lak ba ka kynhun kan ioh pyndonkam na ka bynta ki jingdonkam ki rangialehkai. Ula ong ba kane ka jing ai jingiarap ka dei tang ka jingai mynsiem ban lah kyntiew ia ki kam ialehkai hapoh ka dong ka thain.
