Shillong, Jymmang 13: Ka Meghalaya State League 2023 kala shongshit bha ha ka jingiakhun hynne ka sngi Saitjain da ka jingialeh kai haduh 5 tylli ki jingialehkai ha kylleng ki bynta jong ka jylla Meghalaya ban iaknieh ia ka nam jong ka jingjop.
Ha ka jingialehkai ha ka Group B ha Jowai la pynlong ia ar tylli ki jingiakhun katba ha ka Group A ha Shillong, Group C ha Mawkyrwat bad Group D ha Tura la pynlong mar kawei ka jingialehkai football.
Ha ka jingiakhun kaba nyngkong ha Jowai, la sakhi ba ka Rymbai Iawpynsing SC kala pynliem iaka Youth Club Pdengkarong da 2-0 ha ka jingiakhun kaba la long ha Kiang Nangbah Stadium.
U Slander Nongtdu ula ioh thep ia ka kol kaba nyngkong ha ka minit kaba 6 bad haka minit kaba 28 u Vicky Dkhar ula ioh ban thep ia ka kol ka baar.
Hadien kane, ka Ladthadlaboh SC, kaba la long ka kynhun kaba la wan baar ha ka Super Division jongka West Jaintia District Sports Association kala pynliem da 5 la 0, ia ka Sein Pynbhalang SC kaba long ka lahduh haka First Division jong ka Laskein Block Sports Association .
Ha ka jingialehkai kaba la long ha Shillong, ka Mawlai SC kala pynliem da 5-1 kol ia ka Jyntru, ha kaba u Donlad Diengdoh ula ioh iaka hat trick da kaba thep 3 tylli ki kol ha ka minit kaba 20, 44 bad 72.
Katba u Sanjini Dkhar ula thep ia ka kol haka minit kaba 28 bad u Remark Kharmalki ula ioh thep ia ka kol ha ka minit kaba 78, katba u Emanbhah Marbaniang ula ioh thep shi kol lyngba ka penalty hashwa ban kut ka jingiakhun ha ka wat ka baar.
Ha ka jingialehkai kaba la long ha MDSA Ground, Mawkyrwat, ka Mawten SC kala jop iaka Pyndengrei SC da 2-1 kol katba ha ka jingialehkai kaba la long ha Chandmari Ground, Tura ka Chipakkore FC bad Warima Youth Club kila iakhaid da kaba ia thep mar shi kol.
Ha ka lah sngi u Blei kin don saw tylli ki jingialehkai Footbal kata ha ka Group A ha Shillong ka jingiakhun kan long hapdeng ka Umrit pyrshah ia ka Seng Samla Laitryngew, ha ka por 3 baje mynsngi.
Ha ka Group B, ha Jowai ka jingiakhun kan long hapdeng ka Mulait United pyrshah iaka Youth Club Pdengkarong, ha ka por 2:30 mynsngi, ha ka Group C ha Mawkyrwat ka jingailehkai football kan long hapdeng ka Seven United pyrshah iaka Lumdiengngan, ha ka por 3 baje mynsngi bad haka Group D ha Tura ka jingiakhun kan long hapdeng ka Selsella Sports Association pyrshah ia ka Wasa FC ha ka por 3 baje mynsngi.
