Shillong, Kyllalyngkot 19: Ka Meghalaya Football Association kala pynbna ia ki tarik ban pynlong ia ka jingiakhun jong ka semifinal jonga ka Meghalaya State League 2024.
Ka jingiakhun kaba nyngkong kan long hapdeng ka Ladthadlaboh pyrshah ia ka Mawlai ha SSA Stadium, Polo, ha ka 27 tarik u Kyllalyngkot. Hadien kane, ha ka 28 tarik u Kyllalyngkot, ka jingiakhun kan long hapdeng ka Rymbai Shkenshynriah pyrshah ia ka Shillong Lajong kaban long ha Wahiajer Multipurpose Sports Complex.
Ia ka jingiakhun ia ka semifinal kaba nyngkong yn pynlong ha ka por 4:30 janmiet, katba ka jingiakhun ia ka semifinal ka baar kan long ha ka por 1:30 mynsngi.
Ia ki Tiket lah ban thied na kitei ki madan ialehkai ha kasngi ba pynlong ia ka jingiakhun ha kaba ki nongpeitkai ki lah ban jied ban thied ia ka tiket kaba T.50 ne T.100.
Kum ban shu pynkynmaw, ka Lajong kala pynrem ia ka Rangdajied United da 3-1 kol ha ka Quarterfinal, katba ka Ladthadlaboh kala pynrem ia ka Sutnga da 5-2, ka Mawlai kala pynrem da 8-0 ia ka Khliehmawlieh bad ka Rymbai Shkenshynriah kala pynrem ia ka Chipakkore da 2-0.
Kila don 24 tylli ki kynhun ialehaki kiba la iashimbynta haka MSL 2024 hynrei mynta kila sah tang 4 tylli ki kynhun kiba tbit kiban airing ha ka semifinal kaba kynthup ia ka Lajong bad Mawlai na Shillong), ka Ladthalaboh na West Jaintia Hills bad ka Rymbai Shkenshynriah na East Jaintia Hills.
Ia ka MSL, la pynlong da ka Meghalaya Football Association bad la kyrshan pat da ka sorkar jylla da ka jingthmu ban kyntiew iaka kam ialehkai football ha ka jylla bad khamtam ban plie lad ia ki samla ba kin pyni iala ka sap ka phong.
