Shillong, Nohprah 05 : Ka Meghalaya Games ba 5, ka ban long ha Tura, kan dei kawei ka lympung ialehkai ba pher bha namar ka jingpyniakhleh lang ia ki jingialehkai ba ithuh ka pyrthei lem bad ki jingialehkai nala tynrai ba la shem bad ialehkai tang da ki nongshongshnong ka Jylla.
Kane kan dei ka sien ba nyngkong ba la pynialehkai lang ia ki jingialehkai nala tynrai ha ka Meghalaya Games.
Haba pyntip ia kane, u Myntri Rangbah ka Jylla Conrad K Sangma hynne ka sngi Ba-ar, ula pyntip ba nalor ki jingialehkai ba ithuh ka pyrthei, ki jingialehkai nala tynrai jong ki Khasi, Jaintia bad Garo ruh kin don lang ha kane ka lympung khnang ba ki samla kin ioh iashimbynta ha kine ki jingialehkai bala rim bah bad ban kynmaw ba ki paid riewlum ruh ki dei kiba ieid ia ki jingialehkai.
U iathuh ba kin don 3000 ngut ki nongiashimbynta ki ban wan na kylleng ki thain bapher bapher bad kin ioh ia ka lad ban iakren iakhana para samla ba kin don jingsngew shaphang ka thain bad ban sngewthuh ruh kham bha.
U Myntri Rangbah ula ong ruh ba ka Sorkar Jylla ka kwah ban pyniasoh ia ka Meghalaya Games bad ka Fit India programme.
Ula pynkynmaw ba ki 17 snem bala leit, ka Meghalaya Games ka ju long beit tang ha Shillong hynrei mynta, kane ka lympung kan long noh manla u snem ha ki district bapher bapher. Ka Meghalaya Games ban wan kan long ha Tura bad hadien kane, kan long pat sa ha Jowai, West Jaintia Hills.
Lah ban kdew hangne ba ka Meghalaya Games 2024 ba 5, kan long naduh ka 15 tarik Kyllalyngkot haduh ka 20 tarik Kyllalyngkot ha Tura, West Garo Hills.
