Nongpoh, Naiwieng 06 : Haduh 10 ngut ki nongri Syiar kha pylleng jong ki Self Help Group bapher bapher ka Ri-Bhoi District, kila shah jied ban ioh mar T.10 lak marwei na ka Sorkar Jylla ba kin pynheh ia ka kam kaba ki trei.
Kine ki 10 ngut ki dei kiba la jied kyrpang da ki 4 tylli ki C&RD Block jong ka Ri-Bhoi District bad ia kane ka jingiarap song pisa la pynbna da u Deputy Commissioner ka Ri-bhoi District, ha ka prokram kaba la pynlong ha ka shnong Umden Umsaitprah, Ri-Bhoi.
U Deputy Commissioner, u la pynbna ba kane ka jingiarap song pisa ban kyntiew ia ki kam shimet jong ki dkhot ki SHG’s la pynmang lyngba ka Aspirational District Programme. Ha kane kajuh ka sngi, u Arpit Uphadhayaya u la leit ruh ban plie ia ka sem ri syiar kha pylleng jong ka Kong Birit Nongrum kawei na ki dkhot jong ki SHG’s ha ka shnong Umden Umsaitprah.
Haba ai jingkren, u Deputy Commissioner Arpit Uphadhayaya, u la iathuh, ba kane ka jingpynmang pisa ka dei kaba la leh hadien ka jingkhmih bniah bha ia ka jinglah jong kine ki dkhot ka SHG ban pyndep ia ki jingdonkam bad ruh ia ka jingshah hikai ba ki ioh ban nang kyntiew ia ki kam ba ki trei ha ka kam ri syiar kha pylleng.
U la iathuh ruh, ba kane ka dei ka prokram kaba la mang kyrpang ia ka Ri Bhoi District kum ka Aspirational District, ban kyntiew ia kane ka district ha kiba bun ki liang khamtam ban phaikhmat kyrpang ruh sha ki Self Help Group jong kane ka district ban kyntiew ia ka ioh ka kot jong ki bad ruh ban ai mynsiem ia ka jingtreishitom jong kine ki SHG’s, da kaba kyntu ruh, ba kito kiba la ioh ia ka jingpynmang pisa ba kin pyndonkam hok ia kane ka pisa khnang ba kan long ka jingmyntoi ia ki kum ki dkhot jong ki SHG.
Na ka liang, ka Kong Birit Nongrum, ka dkhot SHG kaba la ioh ia ka jingpynmang pisa, ka la pynpaw ia ka jingsngewnguh ia ki bor pyniaid district kiba la phai khmat ban kyntiew ia ki SHG bad ia ki dkhot jong ki lyngba kine ki skhim ba la mang kyrpang kiba long shisha ka jingai mynsiem ia ki dkhot kiba dei ki longkmie ban ieng ha la ki jong ki kjat.
Ka la iathuh ruh, ba ka kam ri syiar kha pylleng ka long kawei na ki kam kiba bun ki dkhot jong ki SHG ki la ioh jingmyntoi bha, ha kaba ka la ong ruh, ba ia ki pylleng ba ju pynmih ki ju pynpoi 2 sien shitaiew sha ki jaka ba ai jingbam ba tei ia ki khyllung bad longkmie ba armet kiba ju tip kum ki ICDS ha ka dor kaba bit.
