Shillong, Naitung 26 : Ka Nangkiew Irat SC ka la mad ia ka nam iakhaid kaba mar 2-2 kol bad ka Ryntih FC ha ka lympung ialehkai jong ka Shllong Premier League kaba long ha kane ka janmiet ha madan Third Ground Polo.
Ha katei ka jingialehkai, dei ka Ryntih FC kaba ioh ban pynkhih jar nyngkong lyngba u Wilbert Marbaniang tang ha ka minit kaba 21 jong ka kylla step. Utei ujuh u rangialehkai tang hadien arminit u la ioh ban thep biang sa shi kol, kata ha ka minit kaba 23 ban pynlong ia ka kynhun ban ioh lamkhmat haduh 2-0 kol tang ha ka kylla step.
Hynrei dei ynda la poi ka kylla miet ba ka jingiakhun ka ka kylla kynsan hadien ba ka Nangkiew Irat ka la sdang ban iakhun tyngeh khlem da ailad shuh ia ki rangialehkai shakhmat jong ka Ryntih ba kin ioh tur suk sha phyllaw kol jong ka.
Da katei ka rukom ialehkai, ka kynhun ka la ioh ban pynphai shwa shi kol ha ka minit kaba 51 lyngba u Chanmitre Thma. Ym slem hadien kane, kata ha ka minit kaba 71 ka Ryntih la ioh ban pynphai biang sa shi kol lyngba u Khangmiki Pale, kaba pynlong artad ia ka jingiakhun ban iakhaid da mar 2-2 kol.
Hadien kane, watla baroh arliang ki la iakhun tyngeh kim shym la lah satia ban ioh thep kol biang bad kukmta tad haduh ban da kut ka por ialehkai, ka jingiakhun ka la kut noh da mar 2-2 kol.
Ka jingiakhun la shai ka sngi pat kan long hapdeng ka Langsning FC pyrshah ia ka Mawkhar SC ha ka por 4baje janmiet ha kajuh ka jaka.
