Shillong, Naiwieng 22 : Ki 6 ngut ki kyrtong ba iakhun ia ka elekshon shiteng samoi ha Gambegre Constituency, kin ioh ia ka rai u paidbah lashai ka sngi Saitjain ban tip mano ban ioh leit mihkhmat ia ka Gambegre sha ka Iingdorbar Thaw Ain ka Jylla.
Ka jingniew ia ki vote jong kane ka elekshon kan sdang naduh ka por 8 baje mynstep hapoh ka Ophis u Deputy Commissioner ka West Garo Hills, Tura.
La pynbeit ban pyndonkam haduh 14 tylli ki miej na ka bynta ki 51 tylli ki Polling Station. Kat kum ka jingbthah ka ECI, ka jingniew ia ki vote kan sdang shuwa da ki postal ballot ha ka miej jong u Returning Officer bad hadien 30 minit, yn sa sdang ban niew ia ki vote ha ki EVM ki ban long ha ki miej niew vote.
Kat kum ka jingbthah ka ECI, la buh ruh haduh lai syrtap ki bor pahara ha kane ka jaka niew vote nalor ka jingpyndait ia ki kor CCTV ha ki jaka ba donkam.
Ka jingthep vote jong kane ka elekshon shiteng samoi ka dei kaba la long naduh ka 13 tarik Naiwieng bad haduh 90.93% ki briew kila poi ban iathep vote.
Ki kyrtong kiba iakhun ha kane ka elekshon ki kynthup ia ka kyrtong ka NPP Dr Mehtab Chandee A Sangma kurim u Myntri Rangbah Conrad K Sangma, u kyrtong ka Congress Jingjang M Marak uba dei ruh u briew ba iajan bha bad u MP Saleng A Sangma, ka kyrtong ka AITC Sadhiarani Sangma kaba dei ka MDC bad hep kynsi u Dr Mukul Snagma, u MDC ka BJP Bernard N marak bad arngut ki kyrtong shimet-Sengkrabirth M Marak bad Jerry A Sangma.
