Sdang wan kiew ki nongdih drok sha Shillong ban tuh bad ioh pisa bai droks
Nongstoin, Risaw 16: Ka jingsdang ban pur sted jong u drok ka la jur bha ha ka thaiñ jong ka West Khasi Hills District, kaba la wanrah ruh ka jingjot kaba shyrkhei ïa ki khun samla, kat haduh ba ka la pynduh thiah duh dem ïa ki kmie ki kpa kiba don ïa ki khun kiba la ngop ha kum utei u jingdih ba kynsha.
Hynrei wat hapdeng ka jingsngewsih bad ka thma kaba jur, ka don ruh ka jingkyrmen namar don ruh ki khun samla kiba la ngop ha utei u jingdih, mynta ki la sdang ban kyndit bynriew kat haduh ba ki la nud ban mih shakhmat, ban phla ba ki kwah ban kylla noh bad ban ïoh ka jinglaitluid na ka jingshah teh mraw ha utei u jingdih.
Ha ka jingïakynduh jong Ka Shlem, arngut ki samla kiba la angnud ban kylla noh na ka jingim ha ka dih drok, kiba la pynpaw ia ka jingbabe ba kila mad ia une u jingdih uba teh kynjri ia ka jingim jong ki.
Kitei ki ar ngut ki kynthup ïa u Middle Star Nongrum bad u Pyrkhatjanai Marbaniang kiba dei ki nongshong shnong ha sor Nongstoiñ.
Hato ka sorkar ne mano mano ruh ki riew shimet ki lah ne em ban wanrah ïa ka jaka ai jingsumar ne ka Rehabilitation Center, namar lada ki thmu ban leit shaduh sha sor Shillong ruh ki shem jingeh na ka daw ka jingduna ha ka ïoh ka kot.
Ki samla ki la ong ba ki la ïohi bad lap ba don bun napdeng ki samla ba ju ïadih roks lang, ki la kylla long ki briew kiba jrong kti ne ban long ki nongtuh namar ka jingbym ïoh pisa ban thied drok. Kila phla ba ki don bun na ki, kiba sdang ban wan kiew sha sor Shillong ban leh ia ki kam tuh kam thiem ban ioh pisa bai droks namar ka jingbym don lad shuh ban dang sah ha Nongstoin.
Ym tang katta, ki la ong ruh ba lada kheiñ kyllum lang, baroh ki samla kiba la ngop ha ka jingdih drok ha Nongstoin bad ha ka District, ki la kot kumba hajar ngut ei ei kynthup ïa kiba dang shu ngop shen kiba dei ki samla kiba dang sdang khie san ha ka karta.
“Bun ki ñiew beiñ bad kren sniew ïa ngi hynrei kam lei lei namar tang kita kiba la mad bad kiba don ki khun kiba la ngop ha une u jingdih ki ban sngewthuh”, ong kitei ki samla.
Ym tang kine, ka Shlem kala ioh iakynduh ruh sa ia hynriew ngut ki samla kiba la ngop ha u droks, kiba la pynpaw ia ka jingthang shisha ban laitluid noh na u kynjri jong u droks.
Kine ki samla kila phla ba ki don bun ki paralok ba iadih droks kila don ka jingthrang ban kylla noh lada ki ioh ia ki lad jingiarap na ki bor Sorkar.
